ASNN – Xhovani De Biazi i ka kushtuar vazhdimisht aspektit të motivimit mendor të skuadrës së tij dhe këtë herë, italiani ka gjetur një mënyrë më origjinale për t’i frymëzuar lojtarët e tij përpara Evropianit. Në prag të largimit nga Austria, kuqezinjtë kanë vizituar Muzeun Historik të Vjenës ku ndodhet edhe shpata e përkrenarja origjinale të heroit kombëtar, Gjergj Kastriot Skëndërbeu.

“Uroj që të jetë një frymëzim për lojtarët për t’u mobilizuar dhe duke menduar se siç kanë luftuar të parët tanë, pse jo ju të jeni të gjithë nga një hero më vete”, – tha presidenti i Federatës Shqiptare të Futbollit, Armand Duka. Në fakt, për të gjithë ka qenë një moment i veçantë kjo vizitë dhe nga e cila kanë gjetur frymëzimin e duhur dhe kjo dëshmohet edhe fotot e shumta që lojtarët kanë ndarë në rrjetet sociale.

Ndërkohë trajneri italian, De Biazi, vërtet mund të dijë pak nga gjuha shqipe, por me sa duket nuk di pak nga historia, veçanërisht ajo e Shqipërisë dhe e heroit tonë Gjergj Kastriotit. “Përkrenarja shërbente për të mbrojtur kokën, por ishte edhe një simbol për të treguar se ai që e mbante ishte një drejtues”, – ka thënë ai gjatë vizitës në Muzeun e Vjenës.

“Ne kemi nevojë për këtë simbol, por edhe për këtë shpatë, për t’u mbrohemi nga ata që në Evropian do të kërkojnë të na mundin, – ka vijuar 60-vjeçari. – Ne duhet të luftojmë dhe te marrim shembull nga Skënderbeu i cili mendonte se të bashkuar mund të bëjmë gjëra të mëdha. Nëse do të mendojmë vetëm për veten tonë, nuk do të arrijmë asnjë objektiv.”

“Prandaj duhet të arsyetojmë me forcën e grupit që na solli në Francë dhe do të na ndihmojë të arrijmë diçka të madhe edhe në Francë”, – shtoi De Biazi. Ky ishte dhe momenti i fundit ku të 27 lojtarët dhe trajneri ishin bashkë, sepse të martën De Biazi do të vendosë se cila do të jetë lista e 23 lojtarëve që do të vazhdojnë rrugëtimin drejt ëndrrës së Evropianit dhe cilët do të jenë 4 lojtarët që ai do t’i kthejë në shtëpi.