ASNN – Pas përfundimit të garës, kanë folur edhe protagonistët e gjysmëmaratonës së Beratit. “Jam vërtetë shumë i lumtur dhe i kënaqur që kam fituar për të katërtën herë gjysmëmaratonën e Beratit, – ka thënë atleti Ilir Këllezi. – Është një garë në të cilën unë marrë pjesë me shumë kënaqësi dhe është vërtetë një kënaqësi e jashtëzakonshme të vraposh në këtë atmosferë që e jep vetëm Berati.
“Unë vija pas suksesit që kam arritur në Shkup 10 ditë më parë dhe jam në formë të shkëlqyer, – ka vijuar ai. – Suksesin dua ta ndaj me trajnerin tim Juxhin Çili, si dhe shefen e klubit shumësportësh Skënderbeu, Tatjana Marashi për mbështetjen që më japin. Premtoj se do të jem gjithnjë pjesëmarrës në Berat”. Ndërsa fituesja e femrave, kosovarja Manushaqe Nura, shprehu kënaqësinë e triumfit që në debutim.
“Jam pjesëmarrëse për të parën herë në këtë veprimtari dhe sinqerisht që jam dyfish e gëzuar, si për vendin e parë, ashtu dhe për pritjen e mrekullueshme të Beratit, – tha ajo. – Dua të falënderoj organizatorin Gazmend Shehu për ftesën që më bëri. Kam pasur një formë të mirë sportive dhe ia arrita qëllimit dhe pretendimeve të mia që kisha, teksa u rendita në vendin e parë.”
“Do të më pëlqente shumë që në vitin e ardhshëm të ketë sa më shumë vajza nga Shqipëria, sepse kështu gara do të ishte më e fortë”, – ka përfunduar Nura. Ndërsa organizatori i garës, Gazmend Shehu, tha: “Vërtetë që jemi në edicionin e katërt të kësaj veprimtarie, por, nga viti në vit, gjysmëmaratona e Beratit është duke u bërë një garë e njohur për të gjithë.”
“Dhe cilësia është duke u rritur nga gara në garë e kjo i jep më shumë vlera kësaj veprimtarie, – theksoi maratonisti i njohur beratas. – Objektivi im madhor është që të rrisim numrin e pjesëmarrësve në mënyrë që të kemi sa më shumë masivitet nga shumë vende të botë. Fakti flet vetë, teksa kishim një pjesëmarrës nga Kili. Veçse na duhet një mbështetje financiare dhe logjistike.”
“Gjej rastin të falënderoj Kryetarin e Bashkisë së Beratit, Petrit Sinaj, si dhe të gjitha faktorët e tjerë mbështetës që bënë të mundur zhvillimin e kësaj veprimtarie. Në fund, edhe dy fituesit e merituar, Ilir Këllezi dhe Manushaqe Nura”, – ka përfunduar organizatori i gjysmëmaratonës së Beratit, Gazmend Shehu.
