ASNN – Futbollistët e Kombëtares shqiptare u janë nënshtruar një testi antidoping. Inspektorët e sektorit të antidopingut të UEFA-s kanë qenë të mërkurën në mëngjes në qendrën e grumbullimit të kuqezinjve në Austri. Sipas një liste të përcaktuar më parë prej tyre, 10 futbollistë i janë nënshtruar analizave. Kjo është hera e dytë që UEFA kryen test antidoping për lojtarët kuqezinj.
Organizmi që qeveris futbollin evropian, UEFA, ka zhvilluar një kontroll antidoping për futbollistët e Kombëtares shqiptare. Inspektorët e sektorit të antidopingut në UEFA kanë qenë të pranishëm në qendrën stërvitore të Kombëtares kuqezi në Austri në orët e para të mëngjesit të së mërkurës. Menjëherë pas zgjimit, 10 futbollistë u janë nënshtruar testeve përkatëse antidoping.
Cikalleshi, Berisha, Lenjani, Hysaj, Cana, Gjimshiti, Memushaj e Abrashi ishin midis futbolistëve të cilëve iu kryen analizat. Në listë ishin edhe Ansi Agolli dhe Burim Kukeli por këta ende nuk janë bashkuar me skuadrën në grumbullim. Në mungesë të tyre, testit antidoping iu nënshtruan Migjen basha dhe Andi Lila. Futbollistët e përzgjedhur kanë kryer analizat e urinës dhe të gjakut.
Kjo gjë bëri që stërvitja e parë e programuar për të mërkurën paradite nën drejtimin e trajnerit De Biazi, të niste me 15 minuta vonesë. Kjo është vizita e dytë që inspektorët e UEFA-s ushtrojnë kontroll antidoping të befasishëm për kombëtaren shqiptare. Hera e parë ishte në mars, kur kombëtarja do të luante në Austri dy miqësore ndaj Austrinë dhe Luksemburgun.
