ASNN – Goga Basket ka fituar ndeshjen e dytë të finales së “play-off”-it për titullin “kampion” të Kampionatit Kombëtar të Basketbollit për Femra, që u luajt të martën në mbrëmje në Durrës. Flamurtari e pati fituar takimin e parë të zhvilluar para 3 ditësh, madje bindshëm, me shifrat 83-53, por ndeshja e dytë ka qenë tjetër histori dhe durrsaket fitojnë 68-57. Ndeshja e 3-të luhet pas 3 ditësh në Vlorë.

Kampionati Kombëtar i Basketbollit për Femra ka luajtur të martën në mbrëmje ndeshjen e dytë të finales së “play-off”-it për titullin “kampion” dhe Goga Basket ka rikthyer barazpeshën në këtë duel, duke e mundur Flamurtarin me shifrat 68-57 dhe duke e barazuar rezultatin e përgjitshëm të përballjeve në 1-1.

Flamurtari e pati fituar takimin e parë të zhvilluar para 3 ditësh, madje bindshëm, me shifrat 83-53, por ndeshja e dytë ka qenë tjetër histori. Vlonjatet e fitojnë pjesën e parë 16-10 dhe, ndonëse durrsaket fitojnë të dytë 19-14, është skuadra e trajnerit Viron Toska që shkon në pushim duke kryesuar me një pikë të vetme, 30-29.

Fati i ndeshjes është kthyer në dy pjesët e tjera, pasi skuadra vendase, e drejtuar nga veterani Astrit Greva dhe ndihmësi i tij, Vladimir Xheko, e fitojnë të tretën 16-14, duke marrë kryesimin e ndeshjes me shifrat 45-44, duke shpërthyer në të 4-tën, të cilën e fitojnë thellë, 23-13, dhe gjithë takimin 68-57.

Pas ndeshjes, trajneri Greva vlerësoi fitoren, ndërsa homologu i tij vlonjat, Toska, kishte vërejtje për gjykim. Takimi i 3-të i finales së “play-off”-it për titullin “kampion” të Kampionatit Kombëtar të Basketbollit për Femra do të luhet pas 3 ditësh në Pallaton e Sportit “Flamurtari” në Vlorë.

Kampionati Kombëtar

i Basketbollit – Femra

Kalendari i “play-off”-it

për titull “kampion”

Kategoria e Parë

Finalet:

20 maj 2016:

Flamurtari – Goga Basket                83-53  (1-0)

(24-8, 17-14, 22-13, 20-18)

Pallati i Sportit “Flamurtari”, Vlorë

24 maj 2016:

Goga Basket – Flamurtari               68-57  (1-1)

(10-16, 19-14, 16-14, 23-13)

Pallati i Sportit “Ramazan Njala”, Durrës

27 maj 2016:

Flamurtari – Goga Basket               ora 18:00

Pallati i Sportit “Flamurtari”, Vlorë

31 maj 2016:

(nëse do të jetë e nevojshme)

Goga Basket – Flamurtari               ora 18:00

Pallati i Sportit “Ramazan Njala”, Durrës

3 qershor 2016:

(nëse do të jetë e nevojshme)

Flamurtari – Goga Basket               ora 18:00

Pallati i Sportit “Flamurtari”, Vlorë