Në protokollin zyrtar të ndeshjes rezultati fiktiv i ndeshjes është 82-52, kurse në realitet vajzat e Fiorentina Mitkut kanë fituar 83-41. Por dhe pse ndodh kështu, të gjitha palët u pajtuan me atë që erdhi nga tavolina. Studenti ka gjetur fitoren e parë të kampionatit përballë skuadrës më të dobët të këtij sezoni, që është Përmeti. Për hir të së vërtetës, vajzat e Fiorentina Mitkut e kanë fituar ndeshjen në realitet me një diferencë prej 42 pikësh, që do të thotë 83-41. Por ndodh fenomeni më i çuditshëm, që në fakt mbizotëron basketbollin shqiptar.

Nga tavolina, përgjatë pjesës së tretë dhe të katërt, përtej kohës që ikte pa pushim vetëm e vetëm që ndeshja të përfundonte sa më shpejt të ishte e mundur, janë shtuar 11 pikë aforfe Përmetit. Dhe në protokollin zyrtar rezultati është 82-52. Për të vërtetuar faktin që përmetaret nuk kanë fuqi të shënojnë më shumë se 40 pikë është dhe rezultati i ndeshjes së parë me Flamurtarin, atje ku vlonjatet e Toskës fituan 38-82. Dhe për këtë akt aspak të moralshëm e të gënjeshtërt me atë që u luajt në parket nuk u ndje askush, madje gjithçka është bërë dhe me dijeninë e trajnerëve të të dy skuadrave.

E gjithë kjo, që në mënyrë që Përmeti të mos dërrmohej shumë në këtë ndeshje të dytë të kampionatit. Por a e ndihmon ky fakt skuadrën e trajnerit Kaso? Aspak. Për hir të së vërtetës duhet pranuar se përvoja e qendrës Çomollari, që ka luajtur si me Studentin, ashtu dhe me Flamurtarin, por dhe e Halilajt, një tjetër lojtare që deri vjet ka qenë pjesë e ekipit të Fiorentina Mitku, por e Jaçes, ka qenë shumë pak. Përmeti ishte një skuadër e cila kishte vështirësi për të nxjerrë topin nga zona, ku jo pak e ka dhuruar topin për kundërshtaret për shkak të gabimeve të veta, por dhe në gjuajtje.

Studenti me pikëshënuesen më të mirë Mema, por dhe me Lalajn e Metanin, apo dhe Naçollarin e Halilin nuk e ka pasur të vështirë ndaj përmetarëve. Madje mund të kishte shënuar dhe më shumë. Për më tepër, parë dhe nivelin e kundërshtarit, në pjesën e katërt Mitku vendos të aktivizojë lojtaret e reja. Dhe ky mund të ishte momenti më i mirë që Përmeti t’i shënonte ato 11 pikë që “rastësisht” tavolina ia shtoi atyre.

Gjithsesi një ndeshje pa nivel dhe ajo që është më e keqja në basketbollin e femrave Përmeti duket se do të kthehet në një “tabelë qitjeje”, atje ku të gjithë skuadrat do të kërkojnë të rregullojnë pikëaverazhin e tyre. Përfundimisht Studenti e gjeti fitoren e parë të kampionatit dhe u rehabilitua pas humbjes së një jave më parë, 50-77 me Skënderbeun.

Studenti – Përmeti                83-41

(19-4, 21-10, 24-10, 19-17)

Studenti: Mema (28), Lalaj (16), Metani (15), Shima, Naçollari (9) / Halili (11), Dragoni (4), Baraj, Leka, Skënderi, Vani. Trajnere: F. Mitku

Përmeti: An. Çangollari, Çomollari (17), K. Fekollari (2), Jaçe (11), Lamçe (1) / Bektashi, Dalipaj (6), Halilaj (4), Meçani. Trajner: E. Kaso

Gjyqtarë: A. Minarolli, F. Jaçe (Tiranë)

Kampionati Kombëtar

i Basketbollit – Femra

Java e dytë

(25-26 tetor 2014)

Elbasani – Kamza Basket              77-61

Flamurtari – Tirana                          84-72

Skënderbeu – Vllaznia                   75-67

Studenti – Përmeti                           83-41

Apolonia                                            pushim

Renditja

Nr.       Skuadra                     N.        F.         H.        Psh-Pp           Pikë

1. Flamurtari 2          2          0          166-110         4
2. Skënderbeu 2          2          0          152-117         4
3. Tirana 2          1          1          176-149         3
4. Studenti 2          1          1          133-118         3
5. Elbasani 2          1          1          142-165         3
6. Apolonia 1          1          0          85-59            2
7. Vllaznia 2          0          2          126-160         2
8. Përmeti 2          0          2          79-165          2
9. Kamza Basket 1          0          1          61-77            1