ASNN – “Është fantastike, ndihem në mënyrë të jashtëzakonshme, – ka deklaruar Maks Verstapen pas triumfit në Barcelonë. – Nuk besoja aspak, ka qenë një garë shumë e madhe, duhet t’i them “faleminderit” skuadrës që më ka dhënë një makinë fantastike. Të fitosh garën e parë është një gjë fantastike.”

“Besoj që babai im do të jetë krenar për mua, ai ka qenë një shtytje për mua”, – ka përfunduar holandezi. Ndërsa finlandezi Kimi Raikonen, i cili u rendit i dyti me Ferrarin e tij, tha: “Jam i kënaqur për Maksin dhe i zhgënjyer për veten time, i jam afruar, por jo mjaftueshëm, në kthesën e fundit kam humbur pjesën aerodinamike të makinës”.

Ndërsa piloti tjetër i Ferratit, Sebastian Vetel, i cili u rendit i treti, tha: “Sot është dita e Maksit dhe dua t’i bëj komplimentat e mia, ishte i shpejtë, por kur isha pranë tij humbisja forcë. Kemi provuar gjithçka.”