ASNN – Vendimi i UEFA-s për ndeshjen Serbi-Shqipëri, ishte një veprim naiv i organizmit që qeveris futbollin evropian dhe lista e skenave të ngjashme me ato të 14 tetorit në Beograd me protagonistë serbët po zgjatet në kufinjtë e absurdes dhe përtej kufinjve të faljes. Kështu shkruan gazetari i mirënjohur, Ouen Gibson, në një editorial të tijin në të përditshmen britanike, “The Guardian”, të botuar dje, ku ai shton se UEFA duhet të dëshmojë me veprime dhe jo me gjeste butaforike se është me të vërtetë kundër racizmit.
Duke bërë një analizë të ngjarjeve të mbrëmjes së 14 tetorit në Beograd, ai kujton një klishe të kreut të UEFA-s, Mishel Platini, i cili në fillim të këtij viti pati deklaruar se “politikanët duhet të bëjnë politikë, por sporti duhet të jetë vendi i vëllazërimit, që duhet t’i bashkojë njerëzit. Duke cituar vendimin e marrë nga Komiteti i Disiplinës, Gibson thekson se mund të thuhet se mini-helikopteri me banerin ishte shkëndija që bërë gjithçka të shpërthejë, por, pa patur një provë se ai ishte vepër e shqiptarëve, që duhet theksuar se nuk u lejuan të kishin tifozë të tyre në stadium, UEFA është ngatërruar, me këmbët e veta.
Dhe kjo jo për herë të parë, vijon Gibson, i cili, duke kujtuar ngjarjet e Xhenovës në 2010-n, ato të dhjetorit 2012 me racizmin ndaj Nën-21-vjeçarëve anglezë, apo me rrëmujat e përhershme të tifozëve serbë në Kupat e Evropës, lista e skenave të ngjashme me ato të 14 tetorit në Beograd me protagonistë serbët po zgjatet në kufinjtë e absurdes dhe përtej kufinjve të faljes. Dy ndeshje pa tifozë nuk kanë për ta zgjidhur këtë problem, shkruan gazetari anglez, i cili në përfundim të shkrimit të tij, bën një apel.
“Java e shkuar ishte përcaktuar nga UEFA si “java e aksionit kundër racizmit”, e shoqëruar me reklama televizive, T-shirts dhe fjalë të bukura. Por, përderisa këto fjalë të shoqërohen me veprime koherente nga organizmat disiplinorë të UEFA-s, ato nuk do të kenë shumë efekt.
