ASNN – Dhuna e shfaqur pas përfundimit të dy ndeshjeve të rëndësishme dhe vendimtare të Kategorisë së Parë, Korabi-Kastrioti dhe Pogradeci-Luftëtari, ka shqetësuar Federatën Shqiptare të Futbollit, e cila, pasi i ka dënuar ashpër këto akte, kërkon nga komisionet përkatëse në këtë institucion të jenë sa më të rrepta në zbatimin e rregulloreve.
Nëpërmjet një deklarate për shtyp, FSHF-ja pohon se nuk do të tolerohet askush që prish imazhin e lojës dhe frymën “Fair Play”, pavarësisht emrave që mbajnë klubet e përfshira në këto akte që nuk kanë asnjë lidhje me sportin dhe futbollin. Të shtunën, fusha e Peshkopisë dhe ajo e Pogradecit u shndërruan në arena boksi.
Tifozët dibranë nuk kanë ditur të kontrollojnë emocionet e fitores ndaj Kastriotit dhe në fund të ndeshjes dhunuan lojtarët dhe stafin e skuadrës krutane, ndërkohë që në Pogradec, në fund të sfidës mes vendasve dhe Luftëtarit, pati një përleshjeje masive mes lojtarëve dhe stafeve të të dyja skuadrave.
Këto incidente në sfidat e Kategorisë së Parë vijnë pak ditë pas dhunës në përfundim të derbit Tirana-Partizani. Është hera e dytë brenda pak ditësh që FSHF dënon dhunën e shfaqur në veprimtaritë sportive që organizon po vetë, ndërsa pak javë më parë, vetë presidenti i FSHF-së, Armand Duka, ishte i pranishëm në Stadiumin e Peshkopisë.
Ja dhe deklarata e plotë për shtyp e organizmit që qeveris futbollin në vend, e publikuar në faqen e saj zyrtare në Internet:
Ngjarjet e shëmtuara dhe dhuna e shfaqur në përfundimin e dy ndeshjeve të rëndësishme dhe deçizive të Kategorisë së Parë, Korabi-Kastrioti zhvilluar në Peshkopi dhe Pogradeci-Luftëtari në Pogradec, ka shqetësuar seriozisht institucionin e futbollit shqiptar, i cili kërkon të ndajë këtë shqetësim edhe me opinionin publik.
Duket krejtesisht e pakuptueshme dhe e paprecedent, ajo që ka ndodhur në stadiumin e Peshkopisë. Skuadra vendase fiton një ndeshje deçizive për tu ngjitur në krye të tabelës por disa tifozë vendas në vend që të festojnë dhe t’i gëzohen fitores, ushtrojnë dhunë duke sulmuar lojtarët e Kastriotit. Kjo përbën një ngjarje të paprecedent, që kërkon një vëmendje të veçantë. E njëjta gjë ndodh edhe në qytetin e Pogradecit, kur pas barazimit 1-1 dhe përfundimit të ndeshjes, tifozë dhe lojtarë të Pogradecit, sulmojnë dhe godasin futbollistët miq të Luftëtarit.
Federata Shqiptare e Futbollit, dënon dhunën e ushtruar dhe kërkon sa më shumë qetësi dhe gjakftohtësi, në këto momente të rëndësishme të garës. Ne i bëjmë thirrje të gjithë drejtuesve të klubeve, e tifozerive që të respektojnë lojën rezultatin dhe kundërshtarin. Akte të tilla e shëmtojnë futbollin dhe nuk kanë asgjëtë përbashkët me bukurinë që prodhon loja. Ato e njollosin këtë spektakël të bukur dhe emocionin që ai dhuron.
Komisionet përkatëse, menjëherë kanë filluar hetimin e këtyre ngjarjeve të rënda dhe do të japin ndëshkimet më të rënda që paraqet rregullorja.
Federata Shqiptare e Futbollit
