Mbrëmë, në sallën e Qendrës Rinore tek rruga e Kavajës në kryeqytetështë mbyllur Kampionati Kombëtar Individual për Të Rritur dhe Të Rritura në Shah. Dhe Dritan Mehmeti i Butrintit, i cili në 9 ture ka grumbulluar 7 pikë, është shpallur “kampion i Shqipërisë për herë të 5-të.
Një ndeshje e fortë ka qenë dueli i Aleksandër Pacit mes Franc Ashikun, fituar nga shahisti i Veleçikut, i cili me 5.5 pikë ka zënë vendin e 3-të. Kurse në vendin e dytë, po me 5.5 pikë, është renditur shahisti i Elbasanit, Riza Bregu. E të tre këta shahista kanë marrë shpërblimin financiar.
Kështu, vendi i parë e ka pasur çmimin 50,000 lekë, vendi i dytë 30,000 lekë dhe vendi i tretë 20.000 lekë. Ndërkohë, për femra për herë të 12-të është shpallur “kampione” e Shqipërisë, Eglantina Shabanaj e Partizanit, e cila në 9 ture ka grumbulluar 5.5 pikë. Në fakt, podiumi ka qenë një dominim familjar.
Kjo pasi në vendin e dytë është renditur kampionia e vitit të kaluar, po shahistja e Partizanit, Alda Shabanaj me 5 pikë, e cila është edhe motra e kampiones së re. Dhe në vendin e 3-të është renditur shahistja e Akademisë së Shahut, Suzana Kërçiku, e cila ka marrë 4.5 pikë.
Sikurse, për të rriturit, edhe për të rriturat, ka pasur shpërblime financiare, të cilat kanë qenë përkatësisht, vendi i parë 30,000 lekë, vendi i dytë, 10,000 lekë dhe vendi i 3-të 10,000 lekë. Tashmë shahu shqiptar bëhet gati për t’u përfaqësuar në Kampionatin Evropian Individual, i cili nis më 11 maj 2016 në Gjakovë.
