ASNN – Drejtori i Partizanit akuzon drejtuesit e Tiranës për dhunën, Dervishi: “I kam denoncuar në Polici”. Ende i tronditur për atë që pësoi. Drejtori i Përgjithshëm i Partizanit, Dritan Dervishi, doli përpara kamerave një ditë pas grushteve që mori në fytyrë në derbin ndaj Tiranës. Pa u vonuar aspak tregoi se çfarë kishte bërë pas dhunimit. Më pas, ai tregon se çfarë ndodhi pasi ndeshja u mbyll në “Selman Stërmasi”.
Ndryshe nga sa mund të mendohet për Dervishin dhuna në stadiume nuk vjen nga tifozët. Ai përmend administratorin e Tiranës, Shehrin. Partizani, ndërkaq, do të kërkojë nga Federata Shqiptare e Futbollit dënimin e drejtuesve të Tiranës që u bënë pjesë e dhunës, besohet do të përpiqet marrë edhe fitoren në tavolinë, ndonëse e di se do ta ketë të vështirë.
Jehona e derbit vazhdon edhe pas ndeshjes, por këtë herë më shumë sesa për rezultatin flitet për dhunën e cila e eklipsoi lojën dhe spektaklin e dy tifozerive në “Selman Stërmasi”. Klubi i Partizanit nuk është kursyer në deklaratat post derbi dhe kërkon marrjen e masave nga FSHF. “Denoncojmë publikisht veprimet e dhunshme rrugaçërore të stafit të Tiranës”, – deklaroi zëdhënësi Olsi Ranxhi.
“Shkeljet e rënda të dokumentuara nga pamje filmike meritojnë ndëshkim sipas Kodit të Disiplinës Sportive, neni 65”, – shtoi ai. Kurse Drejtori i Përgjithshëm i Partizanit, Dritan Dervishi, një nga më të prekurit e dhunës në derbi pohon se grushti ndaj tij do të hetohet nga drejtësia shqiptare. “Këtu në Shqipëri mesa kam kuptuar problemi vjen nga tribunat VIP”, – ka thënë ai.
“Policia pas ndeshjes bëri sehir, kur u godita pabesisht nga nipi i presidentit, – shtoi ai. -Kam bërë kallëzim në Komisariatin nr. 2 në kryeqytet.” Në bazë të rregullores së FSHF, Tirana si klub organizator i këtij derbi, përveç një gjobe të rende, rrezikon edhe pezullimin e fushës, ndërkohë që drejtori teknik i saj Devi Muka të pezullohet për disa javë nga aktiviteti.
