ASNN – Për Vllazninë e koshit të femrave, ndeshja e javës së fundit të kampionatit me Kamza Basket, takim i luajtur mesditën e së shtunës në pallatin e sportit “Qazim Dervishi” të Shkodrës, ka qenë si një tip “nxemje”, pasi gati 10 ditë më pas basketbollistet kuqeblu, do të nisin ndeshjet e fazës së “play-off”-it, ku në gjysmëfinale do të përballen me Flamurtarin.

Në këtë mënyrë, trajneri Rajmond Rasha bëri kolaudimet e duhura në lidhje me formacionin e parë, por edhe me lojtaret e stolit. Interesante është se mikeshat nga Kamza kanë befasuar në pjesën e parë, kur, në sajë të një loje më të mirë sesa vendëset, arrijnë të kryesojnë në pikëzim, madje duke bërë të mundur edhe fitoren e kësaj pjese me shifrat 17-20.

Udhëzimet e dhëna përpara fillimit të pjesës së dytë nga stafi teknik bënë që basketbollistet shkodrane të ndryshojnë gjithçka në fushën e lojës. Me një mbrojtje të mirëorganizuar, sulme të shpejta dhe luftë të fortë dhe efikase në të dyja tabelat përkatëse, Vllaznia jo vetëm që arrin ta barazojë shumë shpejt shifrat, por menjëherë vihet në udhëheqje të rezultati duke shkuar në dhomat e zhveshjes me epërsinë 38-30.

Me rikthimin në fushën e lojës, forca e Vllaznisë është akoma më e madhe. Kjo shikohet edhe nga lojë shumë e mirë e formacionit kuqeblu, i cili, pasi fiton edhe dy pjesët e gjysmës së dytë, me shifrat 24-13 dhe 26-9, dhe e thellon akoma më shumë diferencën duke e çuar atë në plot 36 pikë më shumë se kundërshtari, në rezultatin final 88-52.

Vllaznia – Kamza Basket    88-52

(17-20, 21-10, 24-13, 26-9)

Vllaznia: Mustafa, I. Dashja, Kraja, A. Dashja, Berrania / Çoçja, Basha, Karafili, Berhani, Lisi. Trajner: R. Rasha

Kamza Basket: Vata, Bakalli, Memçaj, Sokoli, Matka / Ymeri, Sinani, Merdani, Uruçi, Bezati, Kuqi. Trajnere A. Vata

Gjyqtarë: G. Hoxha (Tiranë), M. Kasemi (Vlorë)

Kampionati Kombëtar

i Basketbollit – Femra

Java e 21-të

(30 prill 2016)

Flamurtari – Goga Basket               54-67

Tirana – Elbasani                            95-79

Vllaznia – Kamza Basket               88-52

Skënderbeu – Studenti                  65-68

Renditja

Nr.       Skuadra                     N.        F.         H.        Psh-Pp           Pikë

1. Flamurtari                  21        20          1        1615-1282     41
2. Goga Basket             21        17          4        1796-1318     38
3. Tirana                         21        14          7        1577-1480     34
4. Vllaznia                     21        12          9        1504-1425     33
5. Studenti                     21          7        14        1209-1468     28
6. Kamza Basket          21          6        15        1150-1320     27
7. Skënderbeu              21          6        15        1320-1525     27
8. Elbasani                    21          2        19        1350-1639     22

Faza e “play-off”-it

për titullin “kampion”

Gjysmëfinalet:

Flamurtari – Vllaznia

Goga Basket – Tirana

Shënim: 3 takimet luhen më 10, 13 dhe 17 maj 2016, kjo e fundit nëse do të jetë e nevojshme