ASNN – Janë luajtur të hënën pasdite 4 ndeshjet e para të javë së 31-të të Kategorisë Superiore dhe në takimin që u soll për sportdashësit drejtpërdrejt nga Rrjeti i Radio-Televizionit Shqiptar, Partizani ka fituar 1-0 në Kukës, me një gol të Sukajt në minutën e 94-t, duke marre 3 pikë të arta.
Nga ana tjetër, kjo humbje e lë Kukësin në vendin e 3-të të renditjes, por tashmë me pikë të barabarta, 52, me Teutën, që ka fituar të hënën 4-1 në Pukë ndaj Tërbunit vendas. Në krahun tjetër të renditjes, Vllaznia ka marre një fitore të çmuar, 2-1, në Shkodër ndaj Flamurtarit.
Në një tjetër duel mbijetese, Bylisi ka mundur minimalisht në fushën e vet Laçin, duke i tërhequr kurbinasit në zonën e ftohtë të renditjes dhe duke kapërcyer në renditje mbi Flamurtarin. Takimi i fundit i kësaj jave, ai midis Tiranës dhe Skënderbeut, do të nisë të luhet në ora 19:00, në Stadiumin “Selman Stërmasi”.
