ASNN – Pas meshkujve, që kanë luajtur enjten në mbrëmje aktin e parë të finales së “play-off”-it për titullin “kampion”, sonte është luajtur edhe takimi i parë finales së Kampionatit Kombëtar i Volejbollit për Femra. Siç dihet, ky duel final ka vënë përballë njëra-tjetrës dy skuadrat që kanë rivalizuar në parket gjatë këtyre vitet e fundit, Barleti Volejin dhe Tiranën.
Dhe sfida e parë, që u luajt në sallën qendrore të Pallatit të Sportit “Asllan Rusi” në kryeqytet dhe u soll për sportdashësit drejtpërdrejt në kanalin RTSH Sport të platformës dixhitale të Rrjetit të Radio-Televizionit Shqiptar si dhe në kanalin e dytë tokësor, TVSH 2, u fituar nga “vendaset” me rezultatin. Barleti Volej, që drejtohet nga trajneri Hasan Gurabardhi, erdhi në këtë duel si kampione në fuqi dhe, më së fundi, edhe si fituese e Kupës së Shqipërisë, ku në finale ka mundur pikërisht Tiranën.
Por vajzat bardheblu të drejtuar nga trajneri Adrian Gorenca kanë ardhur duke e rritur lojën e tyre këtë sezon dhe, përtej humbjes së sotme, pritet t’i bëjnë një sfidë të fortë kampioneve në fuqi. Seti i parë ka qenë një zhgënjim total për vajzat bardheblu, pasi Barleti Voleji e ka fituar atë me rezultatin e thellë, 25-9, duke krijuar edhe idenë e një fitoreje të lehtë në 3 sete.
Por nuk ka ndodhur kështu, sepse Tirana ka gjetur forca në setin e dytë, duke reaguar dhe duke e fituar atë me shifrat 25-22. Megjithatë, mungesa e përqendrimit të vazhdueshëm, teksa kryesonte në të dy setet e tjera, është paguar shtrenjtë nga ekipi i drejtuar nga trajneri Adrian Gorenca, pasi Barleti Voleji i fiton ato me të njëjtin rezultat, 25-21 dhe gjithë ndeshjen 3-1.
Siç dihet “play-off”-i final konsiston në 5 ndeshje dhe skuadra që fiton 3 prej tyre shpallet “kampione”. Ndeshja e dytë luhet të hënën, më 25 prill, në Sallën Sportive “Fahrie Hoti” në kryeqytet. Duhet theksuar se, për shkak të një ndeshjeje të Kampionatit Kombëtar të Basketbollit, kjo ndeshje e parë finale e volejbollit të femrave, ka nisur me vonesë dhe jo në ora 19:00, siç ishte parashikuar zyrtarisht.
Kampionati Kombëtar
i Volejbollit – Femra
Programi i finaleve të “play-off”-it
për titullin “kampion”
22 prill 2016:
Barleti Volej – Tirana 3-1 (1-0)
(25-9, 23-25, 25-21, 25-21)
25 prill 2016:
Tirana – Barleti Volej ora 18:00
28 prill 2016:
Barleti Volej – Tirana ora 18:00
1 maj 2016:
Tirana – Barleti Volej ora 18:00
(nëse do të jetë e nevojshme)
4 maj 2016:
Barleti Volej – Tirana ora 18:00
(nëse do të jetë e nevojshme)
