Ish-gjyqtari dhe gazetari i mirënjohur, promovon librin e parë me histori të veçanta e të të shumë personaliteteve të mëdhenj të sportit shqiptar. Gazetari, opinionisti sportiv dhe ish-arbitri i njohur i futbollit, Uvil Zajmi, boton librin e tij të parë me titullin “Emocione 1”, që është i pari në kolanën prej disa të tillësh, që autori përgatitet të botojë. Promovimi i librit është bërë në mjediset e Hotel “Tirana International”, në praninë e një numri të madh ish-sportistësh, një pjesë e të cilëve kanë historitë e tyre në librin e Zajmit, si dhe në praninë e përfaqësuesve të shtypit.
Po ashtu, ishte e pranishme edhe zv/ministrja e Arsimit dhe Sportit, Nora Malaj. Pas fjalës hapëse të botuesit Luan Pengili, ka folur vetë autori i librit, Uvil Zajmi, i cili sjell shumë histori të njerëzve të sportit në karrierën e tyre, por edhe pas saj. Njohës dhe admirues i shumë disiplinave sportive për më shumë se 40 vjet, në veçanti edhe njohës i jetës së protagonistëve, Zajmi i pasqyron në librin e tij momentet më pikante të shumë prej tyre.
Duke dashur që të mos harrohen, madje duke i vendosur në vendin e merituar të memories dhe historisë sportive, autori ndërton figurën sportive, që nga fillimet, karriera, jeta dhe aktiviteti sportiv si dhe ai familjar, por bën me dije dhe çfarë bëjnë e ku janë sot ish-kampionët. I ndërtuar në episode, një stil i veçantë në përshkrimin dhe rikthimin emocional të sportistit, Zajmi i kushton rëndësi edhe faktit se si jetojnë sot këta protagonistë.
Nga Todi Janku, për të vazhduar me Shllakun, Jasharin, Bespallën, Karajën, Berishën, Kaçin, Kazanxhiun, Agim Jankun, treshet e famshme te Dinamos dhe 17 Nëntorit në futboll, apo 5-shen e basketbollit të Tiranës. Pa harruar Viktor Papavangjelin, rekordmenen Klodeta Gjini e për të vazhduar me një seri të gjatë me këta protagonistë. Zajmi, si një dëshmitar i mjaft evenimenteve sportive të kohës, i sjell po aq të ndjera në librin e tij të parë emocionet e paharruara, ashtu siç është edhe vetë titulli, “Emocione”.
