ASNN – Konkurrimi i kuqezinjve të shtangës në Kampionatin Evropian të Peshëngritjes që po zhvillohet në Norvegji, do të vazhdojë sot me Briken Caljen. Ai garon në kategorinë e peshës trupore deri në 69 kg, midis 11 konkurrentëve të grupit A. Gara nis në orën 19.30 dhe do të transmetohet drejtpërdrejt dhe ekskluzivisht nga Rrjeti i Radio-Televizioni Shqiptar, në kanalin e dytë tokësor, TVSH 2, si dhe në kanalin RTSH Sport të platformës dixhitale të transmetuesit publik.
Briken Calja do të jetë peshëngritësi I radhës që do të nisë konkurrimin në Kampionatin Evropian të Peshëngritjes që po zhvillohet në Norvegji. 26-vjeçari shqiptar konkurron sot në peshën 69 kg midis 11 konkurrentëve të tjerë. Sipas tabelës së pasqyruar në faqen zyrtare të kampionatit Evropian të Peshëngritjes, Calja ka deklaruar 333 kg në dygarësh. Nëse arrin të realizojë këtë rezultat shtangisti shqiptar mund të marrë medaljen e argjendtë.
Kjo pasi konkurrenti me rezultatin më të mirë në baterinë A është turku Ismailov, i cili ka deklaruar 335 kg në dygarësh, vetëm 2 kg më shumë se sportisti ynë. Gara nis në orën 19.30 dhe do të transmetohet drejtpërdrejt dhe ekskluzivisht në Rrjetin e Televizionit Shqiptar. Gjatë fazës përgatitore në Shtërmen, Briken Calja ka treguar një formë të mirë sportive duke dhënë rezultate të mira. Pas paraqitjeve jo të mira të dy peshëngritëseve femra, Shqiponja Brahja dhe Evangjeli Veli në dy ditët e para të Evropianit, shpresohet që Briken Calja të marrë medaljen e parë në këtë veprimtari.
Kampionati Evropian është veprimtaria e fundit kualifikuese për në Lojërat Olimpike “Rio de Zhanieiro 2016”, ndaj ka një rëndësi të madhe për peshëngritjen shqiptare, përsa u përket pikëve që do të marrin shntangistët. Në bazë të renditjes që do të arrijnë ata, do të përcaktohet edhe numri i pjesëmarrësve që do të përbëhet ekipi kuqezi që do të marrë pjesë në Olimpiadë.