Dalin jashtë gare Valentino Rosi, Andrea Doviciozo dhe Daniele Pedroza. Kampioni në fuqi i botës, Horge Lorenco, vetëm i dyti. Spanjollët bëjnë ligjin, ndërsa Honda bëhet krenare. Mark Markez, spanjolli i Hondës, ka marrë plotësisht frenat e motoçiklizmit botëror në dorë.
Jo vetëm sepse është kryesues në renditjen e përgjithshme pas tre garave, por sepse me dy fitore radhazi, në Rio Hondo të Argjentinës dhe dje në Ostin të SHBA-së, ka treguar se është pretendent kryesor për të fituar sivjet. Dhe spanjolli që e dominon plotësisht Kampionatin Botëror të Motoçiklizmit dje ka lënë pas Lorencon e Jamahës, që është kampion Bote, si dhe Janonen e Dukatit.
Lufta është bërë vetëm spanjolle, sepse Valentino Rosi ka mbetur jashtë gare, ashtu sikurse dhe Doviciozo dhe Pedroza. E Markez, që ishte fituesi i etapës kualifikuese një ditë më parë, që në hapjen e dritës jeshile të startit të garës vihet përpara Lorencos dhe Rosit.
Por Rosi është i pafat, ndërsa pas xhiros së tretë është rrëzuar dhe ka qenë i detyruar të tërhiqej. Doviciozo e nis mirë, por përfundon jashtë piste së bashku me Pedrozon, të cilët skualifikohen. Bien dhe Smith dhe Krushlov dhe Markez e bën garën i vetëm. Pas tij Lorenco, Janone dhe dy pilotët e Suzukit, Vinales dhe Espargaro.
Moto GP 2016
Renditja përfundimtare e
Çmimit të Madh të Ostinit
1) Mark Markez (Spanjë) Honda 43’57”945
2) Horge Lorenco (Spanjë) Jamaha +6”107
3) Andrea Janone (Itali) Dukati +10”947
4) Maverik Vinales (Spanjë) Suzuki +18”422
5) Aleiks Espargaro (Spanjë) Suzuki +20”711
6) Skot Reding (Britani e Madhe) Dukati +28”961
7) Pol Espargaro (Spanjë) Jamaha +32”112
8) Mishele Pirro (Itali) Dukati +32”757
Renditja e përgjithshme e
Botërorit të Motoçiklizmit
1) Mark Markez (Spanjë) Honda 66 pikë
2) Horge Lorenco (Spanjë) Jamaha 45 pikë
3) Valentino Rosi (Itali) Jamaha 33 pikë
4) Pol Espargaro (Spanjë) Jamaha 28 pikë
5) Daniel Pedroza (Spanjë) Honda 27 pikë
6) Maverik Vinales (Spanjë) Suzuki 23 pikë
7) Aleiks Espargaro (Spanjë) Suzuki 21 pikë
