Tirana në volejboll për meshkuj ka vulosur vendin e tretë në renditjen përfundimtare të tre fazave me vajtje-ardhje, ndërsa Farka Volej nuk e ka përballuar dot. E ka nisur mirë setin e parë skuadra e Dritan Bardhit, që ka kryesuar deri në 14-13. Mirëpo Tirana përmbys dhe arrin ta fitojë setin e parë 25-22. Sërish Farka Volej është në epërsi në setin e dytë.

Madje e ka mbajtur këtë deri në fund, kur dhe ka fituar 25-20. Në dy të tjerët, Farka Volej demonstron një skuadër të lodhur, aq sa Tirana me shumë lehtësi ia ka dalë të fitojë 25-13 dhe 25-14 dhe në fund 3-1. Pikëshënuesi më i mirë i ndeshjes ishte Ferhati i Tiranës, me 18 pikë, i ndjekur nga Lundra i Tiranës dhe Koçi i Farka Volejit, me nga 11 pikë secili.

Në bllok kanë dalë fitues Pepa dhe Kula të Tiranës me nga 5 mure fituese pasuar nga Qepa dhe Bajrami të Farkës me nga 3. Në shërbim është fitues Rama dhe Lundra të Tiranës me dy të tilla. Në total, në katër sete, Farka Volej ka shënuar 74 pikë, prej të cilave 47 pikë vetë, kurse 27 pikë kanë ardhur nga gabimet e Tiranës. Në krahun tjetër Tirana ka realizuar 95 pikë në katër sete prej të cilave 74 pikë vetë.

Kurse 21 pikë kanë ardhur nga gabimet e Farka Volejit. Për t’u evidentuar janë edhe dy kartonë të verdhë për Metanin e Farka Volejit dhe Ferhatit të Tiranës për protesta ndaj vendimeve të gjyqtarit. Përfundimisht, Tirana nuk e lëshon vendin e 3-të të renditjes, ndërsa Farka Volej, e cila e kishte siguruar që më parë “play-off”-in, tanimë po mendon për duelet gjysmëfinale me Studentin.

Farka Volej – Tirana             1-3

(22-25, 25-20, 13-25, 14-25)

Farka Volej: Deliu, Bërdufi (L), Qepa, Koçi, Metani, Nimani, Bajrami / Vllaçaj, Hodaj, Xhajkone, Plaku, Topçiu (L). Trajner: D. Bardhi

Tirana: Ferhati, Pepa, Xhabrahimi, Rama, Xhija, Kula, Kasemi (L) / Lundra, Ndoni. Trajner: I. Koja

Gjyqtarë: A. Shehu, R. Mujo (Tiranë)

Ndihmës: A. Brokaj (Tiranë), R. Ekmekçiu (Elbasan)

Kampionati Kombëtar

i Volejbollit – Meshkuj

Java e 21-të

(9 prill 2016)

Farka Volej – Tirana             1-3

Elbasani – Teuta                   3-0

Skënderbeu – Studenti       0-3

Vllaznia                                 pushim

Renditja

Nr.       Skuadra         N         F          H         Setet               Pikë

1. Studenti         18        14          4        46-21              41
2. Vllaznia         18        14          4        46-25              40
3. Tirana             18        11          7        42-24              37
4. Farka Volej    18        11          7        39-27              32
5. Teuta              18          9          9        35-36              25
6. Skënderbeu  18          3        15        12-46                9
7. Elbasani        18          1        17        10-51                5