ASNN – Kampionati Kombëtar i Volejbollit për Meshkuj ka luajtur dje 3 takimet e javës së tij të 19-të, ndërsa Tirana ka qenë pushim. Studenti është rikthyer, ndërsa ka gjetur fitoren pas dy humbjeve radhazi, duke mposhtur Farka Volejin me rezultatin 3-1.

Atëherë kur është menduar se Studenti po e çonte ndeshjen në një rezultat të pastër ka kthyer Farka Volej. Studenti i trajnerit Ylli Tomori e ka nisur mirë, ndërsa ka fituar dy sete radhazi.

Por skuadra e Dritan Bardhit ka fituar setin e tretë, në një maratonë, duke luftuar dhëmb për dhëmb në setin e 4-t, një tjetër maratonë, që sidoqoftë, në fund është vendosur nga përvoja e Studentit, që e fiton kështu takimin 3-1.

Ndërkohë Vllaznia ka forcuar kryesimin në volejbollin e meshkujve, por ka vuajtur për të mundur Teutën 3-1 mbrëmë në “Qazim Dervishi”, në takimin e vlefshëm për javën e 19-të të Kampionatit Kombëtar të Volejbollit për Meshkuj.

Në takimin e fundit të kësaj jave, Elbasani është mundur pastër nga Skënderbeu me rezultatin 3-0. Vllaznia kryeson me 38 pikë, 3 më tepër sesa Studenti, ndërsa Tirana mban vendin e 3-të me 33 pikë dhe Farka Voleji të 4-tin, me 29.

Kampionati Kombëtar

i Volejbollit – Meshkuj

Java e 19-të

(2 prill 2016)

Vllaznia – Teuta                   3-1

Farka Volej – Studenti        1-3

Elbasani – Skënderbeu      0-3

Tirana                                     pushim

Renditja

Nr.       Skuadra         N.        F.         H.        Setet               Pikë

1. Vllaznia         17        13          4        43-23              38
2. Studenti         16        12          4        40-21              35
3. Tirana             16        10          6        37-20              33
4. Farka Volej    16        10          6        35-23              29
5. Teuta              16          9          7        34-30              25
6. Skënderbeu  17          3        14        12-43                9
7. Elbasani        16          0        16          7-48                2