ASNN – Përpara miqësores me Luksemburgun, trajneri i kuqezinjve, Xhovani De Biazi ka kërkuar nga futbollistët e tij vëmendje dhe përkushtim, pasi kundërshtari nuk është i lehtë. Më tej ai ka kërkuar mbështetjen e tifozëve duke shpresuar të jenë të shumtë në numër edhe në Francë, në përmbushjen e misionit të vështirë që kanë futbollistët e tij në fazën finale të Evropianit.
Kombëtarja shqiptare luan të martën miqësoren me Luksemburgun. Ky është testi i radhës për 23 lojtarët kuqezinj, të cilët pretendojnë të shkojnë në Francë. Pasi deri në qershor, kur nisin eliminatoret e Evropianit, Kombëtarja do të ketë edhe një ndeshje me Katarin, në të cilin trajneri do të mund të testojë lojtarët e tij. Duke folur para sfidës me Luksemburgun është shprehur, De Biazi ka zbuluar një surprizë.
“Me Luksemburgun do t’u jap mundësinë të luajnë edhe disa lojtarëve të tjerë, të cilët nuk luajtën me Austrinë, – ka thënë italiani me pasaportë shqiptare. – Dua t’i shikoj në veprim dhe më pas do të vendos se cilët do të jenë pjesë e ekipit përfaqësues që do të shkojë në Francë.” Për sfidën me Luksemburgun De Biazi ka kërkuar përqendrim dhe vëmendje nga lojtarët e tij.
“Duhet të kemi kujdes me Luksemburgun pasi ky ekip ka mundur edhe Greqinë, – ka kujtuar kreu i stolit të Kombëtares kuqezi. – Nuk duhet të përsërisim gabimet që bëmë në pjesën e parë me Austrinë. Nëse luajmë si në 45 minutat e dyta, mund ta vemë në vështirësi kundërshtarin dhe të marrin rezultat pozitiv”. De Biazi ka folur edhe për të ardhmen e Milot Rashicës.
“Nëse do të luajë ashtu siç po luan me Vitesen, në të ardhmen do të jetë një protagonist me kombëtaren, – ka thënë ai. – Mendoj se do të jetë në projektet e Kombëtares për Botërorin e Rusisë”. Në fund trajneri italian ka kërkuar edhe mbështetjen e vazhdueshme të tifozëve. “Ashtu si gjithnjë, tifozët kuqezinj janë lojtari ynë i 12-të”, – ka thënë 60-vjeçari.
“Kërkojmë mbështetjen e tyre edhe në Francë, – ka vijuar trajneri i kuqezinjve, Xhovani De Biazi. – Mendoj se do të jenë të shumtë atje për të përkrahur skuadrën tonë në arritjen e suksesit në misionin e vështirë që kanë finalet e Evropianit”.
