ASNN – Ka qenë i shumëngjyrshëm në përzgjedhjen e fjalëve, por unanim në qëndrimin e tij, i gjithë shtypi shqiptar përsa i përket vendimit të marrë nga UEFA për ndeshjen Serbi-Shqipëri. Reagimi për këtë vendim, ka qenë kryefjala e të gjitha gazetave të ditës në Shqipëri, qofshin këto sportive apo jo dhe kronika e mëposhtme na sjell titujt më të spikatur.
Vendimi i organizmit që qeveris futbollin evropian, UEFA, përsa i përket ndeshjes Serbi-Shqipëri ka qenë kryefjala e të gjitha gazetave të ditës në Shqipëri, qofshin këto sportive. Në fakt, ka qenë i shumëngjyrshëm në përzgjedhjen e fjalëve, por unanim në qëndrimin e tij, i gjithë shtypi shqiptar, duke variuar nga indinjata e thellë e deri ta sarkazma.
“Vendim politik, UEFA i thotë po racizmit të Serbisë”, – shkruan e përditshmja më e madhe në vend, “Panorama”, ndërsa në të njëjtën linjë editoriale janë edhe titujt e gazetave të tjera në vend, si “Shekulli”, “Gazeta Shqiptare”, “Dita”, “Standard”, “Tema”, “Tirana Observer” apo gazeta “Sot”, të cilat e cilësojnë vendimin e UEFA-s si të motivuar politikisht, pasi ka injoruar dhunën ndaj kuqezinjve.
Në titujt e tyre, ato i referohen edhe shfaqjes në fushën e blertë të huliganit serb, Ivan Bogdanov. E përditshmja “Shqip”, thekson në titullin e saj se kuqezinjtë “u dënuan se nuk pranuan të vdisnin”, ndërsa gazeta “MAPO”, titullin e saj “Parodia e UEFA-s” e ka shoqëruar me një karikaturë nga i mirënjohuri Bujar Kapexhiu. Të ashpra kanë qenë edhe gazetat sportive dhe “Panorama Sport”, duke shtrembëruar emrin e kreut të UEFA-s, hapet me titullin “Platinoviç dënon Shqipërinë”.
“Sport Ekspres” e quan francezin “Armiku ynë”, ndërsa “Sport Plus” thekson se në fakt, UEFA nuk vendosi. As gazetat e partive politike nuk kanë mundur t’i shpëtojnë valës së reagimit publik ndaj këtij vendimi të UEFA-s, duke e patur atë, natyrisht me ngjyrimet përkatëse politike, në titull kryesor të numrit të tyre të sotëm.
