ASNN – Kombëtarja e Nën-21-vjeçarëve të Shqipërisë, do të luajë sot ndeshjen e radhës të vlefshme për fazën eliminatore të Kampionatit Evropian të kësaj grupmoshe. Përballë kuqezinjve të vegjël do të jetë përfaqësuesja e 21-vjeçarëve të Hungarisë. Ndeshja Shqipëri-Hungari do të luhet sot në orën 20:00, në Stadiumin “Elbasan Arena” dhe do të transmetohet drejtpërdrejt nga kanali i dytë i Televizionit Shqiptar, TVSH 2, si dhe nga kanali RTSH Sport i platformës dixhitale të transmetuesit publik.
Kështu, sot në mbrëmje kuqezinjtë Nën-21-vjeçarë do të luajnë sfidën e radhës, të vlefshme për Eliminatoret e Kampionatit Evropian. Pas barazimit 0-0 të arritur me Greqinë pak ditë më parë, përballë djemve të trajnerit Redi Jupi do të jenë homologët e Hungarisë. Kundërshtari ndodhet në vendin e 4-t në renditje, me 8 pikë, por me një ndeshje më pak se Shqipëria e vendit të dytë, që ka 9 pikë. Futbollistët kuqezi kanë kryer seancën e fundit stërvitore të dielën në mbrëmje dhe trajneri Jupi është shprehur se lojtarët e tij gëzojnë një formë të mirë.
Sipas tij, me mbështetjen edhe të tifozëve, shpresohet tek një rezultat pozitiv. Për Shqipërinë, në sfidën me Hungarinë, do të mungojë për shkak të një dëmtimi Emiljano Hysi, sulmuesi që luan në Angli. Gjithashtu nuk do të jetë as futbollisti i Viteses në kampionatin holandez, Milot Rashica, që i është bashkuar Kombëtares së të rriturve për ndeshjen me Luksemburgun.
Po kështu, edhe Eros Grezda, i cili ka ardhur në Tiranë, nuk mund të luajë ende me bluzën e kombëtares, për arsye se nuk ka marrë ende një pasaportë shqiptare. Kjo është ndeshja e 8-të në grup për Shqipërinë. E parafundit do të jetë ajo Greqi-Shqipëri, e cila do të luhet në 2 shtator 2016, ndërsa e fundit ajo që do të luhet 8 ditë më pas, në Izrael, ndaj përfaqësueses vendase të Nën-21-vjeçarëve.
