ASNN – Xhudoja shqiptare vazhdon të përfaqësohet me mjaft dinjitet në arenën ndërkombëtare. Suksesi i radhës është ai i arritur nga xhudisti shkodran, Xhovani Shkoza. 18-vjeçari i talentuar, pjesë e Vllaznisë në kampionatin shqiptar, ishte i ftuar në Turneun Ndërkombëtar të Hapur të Xhudos “Kopenhagen Open”, në të cilën morën pjesë pothuajse gjithë shtetet e Evropës perëndimore. Në total konkurruar rreth 500 xhudistë.
Sipas informacionit marrë nga Kopenhagen, përmes shoqëruesit të sportistit shkodran Ferdinand Jaku, president i KF Juban Danja në futboll për femra, i cili mundësoi financiarisht pjesëmarrjen e Shkozës në këtë veprimtari, xhudisti i Vllaznisë, Xhovani Shkoza ka konkurruar në kategorinë e peshës trupore deri në 66 kg, kategori kjo për grupmoshën Nën-18-vjeç.
Bazuar në shortin përkatës të veprimtarisë, Xhovani Shkoza zhvilloi katër ndeshje përkatësisht përballë kundërshtarëve nga ekipet e shteteve të Suedisë, Finlandës dhe dy të tjerë të Holandës, të cilat i fitoi që të katërta, duke u shpallur fitues në peshën e tij. Në ceremoninë e mbylljes së krejt veprimtarisë, krahas medaljes së artë të fituar me plot meritë nga Xhovani Shkoza, organizatorët i dorëzuan atij edhe një trofe, kupë personale.
Suksesi i Xhovani Shkozës vjen si rezultat i punës pasionante që zhvillohet në xhudon shkodrane, ku përpos ekipeve të Vllaznisë funksionojnë me të njëjtin sukses edhe ato të Vaut të Dejës dhe të Akademisë “Anton Shkoza”. Për t’u theksuar është se medalisti i artë, Xhovani Shkoza, së bashku me motrën e tij, Aurora Shkoza, dhe vëllain tjetër më të madh, Luigji Shkoza, me titujt “kampion” kombëtarë dhe ndërkombëtarë që po fitojnë nga turneu në turne, po e çojnë edhe më lart traditën dhe emrin e babait tyre Anton Shkoza, me mjaft kontribute në xhudon shkodrane dhe atë shqiptare.
