Trajneri i bardhebluve Borova: “Do të kërkojmë të përsërisim atë nivel loje si me Goga Basket, atë shpirt luftarak deri në sekondën e fundit. Vetëm kështu mund të fitojmë ndaj Flamurtarit”. Tirana-Flamurtari është kryendeshja e kësaj jave në Kampionatin Kombëtar të Basketbollit për Femra, takim i cili do të luhet të shtunën, duke nisur nga ora 12:00, në Sallën Sportive “Fahrie Hoti” në kryeqytet.
Deri më tani Flamurtari ka dalë fitues tre herë me Tiranën, teksa e ka mundur më 26 dhjetor në “Farie Hoti”, 71-68. Më pas në finalen e Kupës së Shqipërisë, 69-50 më 13 shkurt në “Asllan Rusi” dhe në kampionat, këtë herë në Vlorë, 77-67. E tashmë duket se është koha që Tirana e Borovës të vërtetojë se jo vetëm është e denjë që të përballet me Flamurtarin, por dhe të fitojë ndaj kësaj skuadre.
Ja dhe intervista që ka dhënë Erdal Borova, trajneri i Tiranës në basketboll për femra, për të përditshmen sportive shqiptare, “Sport Ekspres”, që AlbanianSport.com jua sjell këtu:
– Luhet kryendeshja e javës me Flamurtarin, që ju ka mundur tre herë këtë sezon. A ka ardhur koha dhe momenti që edhe Tirana të fitojë ndaj vlonjateve?
– Koha gjithmonë ka qenë dhe nuk ka asnjë lidhje me zgjedhjet që do të bëhen në Federatën Shqiptare të Basketbollit. Mos e merrni seriozisht, ishte sa për humor. Por tashmë po e fus në seriozitet diskutimin. Ndeshjen me Flamurtarin ne e konsiderojmë ndeshje të radhës në kampionat dhe ne duhet të luajmë njësoi si me ekipin e fundit, ashtu dhe me atë që kryeson. Mendoj se kemi të gjitha kushtet që edhe ne të fitojmë me Flamurtarin dhe ajo duhet të ndodhë këtë të shtunë
– Cila është gjendja në skuadrën tuaj dhe sa mundësi ka që Tirana të përsërisë atë ndeshje që ka bërë përpara dy javësh ndaj Goga Basket?
– Gjendja është e mirë dhe mendoj e do të kërkojmë që të përsërisim atë ndeshje të mirë me Goga Basket. Pra të luajmë me të njëjtin nivel loje, me të njëjtin shpirt e mentalitet luftarak deri në sekondën e fundit, sepse vetëm kështu do të mund të jemi fitues ndaj Flamurtarit.
– Ndonjë vlerësim për kundërshtarin dhe çfarë do t’i kërkoni skuadrës, apo cila do të jetë ajo pikë kyçe për të arritur tek suksesi?
– Loja e shpejtë dhe një bashkëpunim të mirë në mbrojtje, sepse vetëm kështu mund ta përballojmë Flamurtarin.
