ASNN – Përfaqësuesja e Nën-21-vjeçarëve të Shqipërisë, që njihet ndryshe si Shpresat, ka marrë një tjetër pikë të vlefshme në kuadër të grupit të 4-t të Eliminatoreve të Evropianit të kësaj grupmoshe, duke u ndarë të enjten me rrjeta të paprekura me Greqinë. Kjo ndeshje, që u luajt në Stadiumin “Elbasan Arena” u soll për sportdashësit drejtpërdrejt në kanalin e dytë tokësor, TVSH, si dhe në kanalin RTSH Sport të platformës dixhitale të transmetuesit publik, u mbyll pa gola. Shqipëria mban aktualisht vendin e dytë në renditje, me 9 pikë të grumbulluara pas 7 ndeshjesh.
Minutat e lojës:
4′ Krosim në zonën e rreptësisë helene, grumbull lojtarësh kuqezi para portës greke, por portieri Barkas del me shpejtësi dhe eviton rrezikun.
6′ Kundërzbritje e shpejtë e miqve nga e majta e sulmit të tyre, gjuan Joanidas, por jashtë kuadratit të mbrojtur nga Strakosha
11′ Çekiçi gjuan fuqishëm nga distanca. Topi kalon fare pranë traversës së portës së mbrojtur nga Barkas.
13′ Sërish Çekiçi depërton në zonën kundërshtare, duke kaluar tre futbollistë miq njëri pas tjetrit. Gjuan nga e majta e sulmit kuqezi, por një mbrojtës i ekipit grek e devijon topin tej vijës fundore
18′ Liridon Latifi shpërthen në një kundërsulm, por ndalet në mënyrë të parregullt nga Janulis, që ndëshkohet me karton të verdhë.
20′ Ekipi grek organizohet mirë në mesfushë dhe kundërzbret me shpejtësi nga e majta. Gjuan Donis drejt kuadratit të portës kuqezi, por Strakosha pret mjeshtërisht
49′ Goditje këndi për kombëtaren shqiptare, godet Laçi, por pret portieri grek.
57′ Rashica pengohet në mesfushë, por gjyqtari nuk jep goditje dënimi për tanët dhe loja vazhdon normalisht
58′ Gjuan kapiteni i skuadrës greke, Mavrias, por Strakosha bën një pritje tjetër të shkëlqyer.
62′ Manaj ka pasur një moment të mirë për të shënuar, por nuk e ka shfrytëzuar si duhet, teksa nuk ka arritur të godasë, sepse portieri grek ia ka rrëmbyer topin nga këmbët.
65′ Manaj pengohet nga dy mbrojtës grek brenda zonës së rreptësisë helene, por gjyqtari vazhdon lojën edhe pse faulli ishte i dukshëm.
84′ Rashica kroson për në zonën helene për te Hoxhallari, që vonon më shumë se sa duhej.
88′ Bergos provon të gjuajë me të djathtën e tij nga jashtë zonës. Portieri Strakosha si gjithmonë i vëmendshëm ndodhej në pozicion.
90′+1 Futbollisti Milot Rashica godet fuqishëm me të djathtën, por topi devijohet në goditje këndi nga kundërshtari dhe në përfundim 0-0.
Shqipëri – Greqi (Nën-21-vjeçarët) 0-0
E enjte, 24 mars 2016, ora 18:00
në stadiumin “Elbasan Arena”
Shqipëri: Th. Strakosha, Lulaj, Rrahmani, Prenga, Hoxhallari, Bare, Laçi (Broja 75’), Çekiçi, Rashica, Latifi (Gavazaj 75’), Manaj. Trajner: R. Jupi
Greqi: Barkas, Migas, Risvanis, Gutas, Siopis (Tzanetopulos 72’), Mavrias, Kiarisis, Joanidas (Masuras 64’), Kuluris (Vergos 83’), Donis, Janopulos. Trajner: A. Nikopolidis
Gjyqtarë: N. Rainvil, L. Stien, F. Haket (Francë)
Kartonë të verdhë: Hoxhallari / Siopis, Janopulos
Evropiani 2017
Nën-21-vjeçarët
Eliminatoret
Grupi 4
Renditja
Nr. Skuadra N. F. B. H. Gsh-Gp Pikë
- Portugalia 6 6 0 0 23-1 18
- Shqipëria 7 2 3 2 8-13 9
- Izraeli 5 2 2 1 8-4 8
- Hungaria 6 2 2 2 10-8 8
- Greqia 5 2 1 2 8-6 7
- Lihteshtejni 7 0 0 7 0-25 0
