Kandidati për president të FSHB-së: “Duhet të mendojmë seriozisht për të ardhmen e basketbollit. Atë nuk mund ta ndërtojë një i vetëm, por i gjithë komuniteti duhet të jetë i bashkuar dhe në harmoni të plotë. Ne të ndërtojmë një objekti dhe një strategji për një basketboll ndryshe.” Arben Fagu, kandidati për president i Federatës Shqiptare të Basketbollit në zgjedhjet e 30 marsit në Korçë, ka bërë daljen e tij të parë publike në “Sport Magazin” të “Ora News”.
Për Fagun basketbolli edhe duke qenë një pjesë e rëndësishme e karrierës së tij mbetet një nga pasionet e tij më të mëdha për të mos thënë një ëndërr që vazhdon. Është propozuar nga një pjesë e komunitetit të koshit, ndërsa ka treguar dhe se si është marrë vendimi. “Ditë për ditë duke biseduar me miqtë dhe shokët ne ndajmë dëshirat dhe ëndrrat për të ardhmen e basketbollit, – ka rrëyer ai. – Vetë kërkesat që miqtë dhe kolegët më bënë, më detyruan të merrja vendimin për t’u futur në garë për president.”
“Një vendim jo i lehtë, sepse nuk ka qenë dëshira ime të isha në këtë post të presidentit, por basketbolli është ëndrra ime”, – ka vijuar Fagu, që nuk ka kërkuar të merret me të kaluarën, apo me atë se çfarë është bërë mirë dhe keq nga presidenti aktual Ponari. “Natyrisht nuk do të jetë një garë e lehtë, – ka pohuar ai. – Së pari nuk ka pse të jetë e thjesht, pasi secili ka miqtë dhe përkrahësit, idetë e projektet e veta. E në fund vendos komuniteti.”
“Ideja është se çfarë unë do të realizoj dhe çfarë do të bëj për të ardhmen e basketbollit, – ka thënë ish-basketbollisti, së fundmi trajner i ekipit privat të Universitetit Amerikan të Tiranës (UAT). – Kush punon dhe gabon. Nëse do të merremi me atë se çfarë kanë bërë gabim nuk shohim përpara. Duhet të mendojmë shumë seriozisht. Basketbolli nuk mund ta ndërtojë një njeri i vetëm, por i gjithë komuniteti duhet të jetë i pranishëm dhe në harmoni.”
“Secili ka ankesat e veta, por ne duhet të ndërtojmë një objektiv dhe një strategji të caktuar që duhet të bëjmë”, – ka shtuar ai. Sipas Fagut basketbolli ka mbijetuar falë frymës e sakrificës së trajnerëve, fëmijëve dhe të rinjve që e duan këtë sport: “Basketbolli ka një histori që është ngritur e ulur e kjo në bazë të shumë njerëzve, basketbollistëve, trajnerë. Komuniteti i basketbollit ka nivelin më të lartë intelektual. Një trashëgimi kanë lënë edhe këto që janë në Federatë. Por është koha për të ndryshuar”.
