Barleti Volej është fituese për herë të pestë e Kupës së Shqipërisë në volejboll për femra, ndërsa e merr këtë trofe për herë të tretë radhazi. Ashtu sikurse edhe sezonin e kaluar, edhe këtë herë ka qenë përballë Tiranës, që me Nezajn, Shkurtin, Tucin, Sejfullain dhe Bllokun ka qenë shumë më e fortë se herët e tjera. Për të mos thënë 50 me 50 me shansin për të fituar këtë trofe.

Në setin e parë bardheblutë luajnë mirë dhe kryesojnë vazhdimisht 3-6, 4-8. Kthen Barleti Volej në 16-14, 20-19. Por sërish bardheblutë nuk dorëzohen dhe marrin setin e parë 21-25. Në të dytin e në vazhdim është tjetër melodi. Barleti Volej lëshohet fort që në fillim të setit të dytë, teksa kryeson 4-1, 8-2, 16-8, 18-13, 24-18 dhe në fund 25-18. I treti ka nisur mirë për Tiranën që kryeson deri në 6-9.

Por Barleti kthen përsëri në 16-14, 18-15, 21-19. Ka edhe acarime, sepse Gurabardhi është ndëshkuar me karton të verdhë dhe më pas dhe të kuq dhe 23-22. Tirana barazon në 24-24. Por në pikët e fundit ka fituar Barleti Volej, 26-24. I fundit është paksa pa shije, sepse është dëmtuar dhe Shkurti, ndërsa Tirana nuk ka më forcë për të përballuar dhe Barleti Volej fiton 25-16 dhe krejt ndeshjen 3-1.

Pikëshënuesja më e mirë e ndeshjes është Bici me 17 pikë e ndjekur nga Braho me 15 pikë, si dhe Shkurti e Tiranës me 13 pikë. Në bllok ka dalë fituese Nezaj me 11 mure fituese e ndjekur nga Malvina Tuci me 5 mure fituese. Në shërbim dallohet Xheka e Barleti Volejit me 5 të sakta.

Në total në katër sete Barleti Volej ka realizuar 96 pikë prej të cilave 71 pikë ka shënuar vetë, kurse 25 pikë kanë ardhur nga gabimet e Tiranës. Në krahun tjetër Tirana në katër sete ka realizuar 83 pikë prej të cilave 53 pikë vetë, kurse 30 pikë kanë ardhur nga gabimet e Barleti Volej.

Barleti Volej – Tirana            3-1

(21-25, 25-18, 26-24, 25-16)

Barleti Volej: Xheka, Braho, Fagu (L), Bici, M. Tuci, Xhixha, Thaka / Picaku, Hasku. Trajner: H. Gurabardhi

Tirana: Pirra, Shkurti, Blloku, E. Tuci, Nezaj, Hoxha, Sejfullai (L) / Lasku, Agolli. Trajner: A. Gorenxa

Gjyqtarë: I. Fështi, E. Dusha (Tiranë)

Kupa e Shqipërisë

Volejboll – Femra

Kalendari i fazës finale:

(11-12 mars 2016)

Të premten:

Barleti Volej – Vllaznia        3-0

Tirana – Teuta                      3-0

Të shtunën:

Për vendet 3-4:

Vllaznia – Teuta                    3-1

Finalja:

Barleti Volej – Tirana            3-1