Trajneri i ri i Kombëtares së meshkujve, qiprioti Antonis Kostantinides, tashmë ka nisur dhe bisedimet me të gjithë lojtarët e Kombëtares së Shqipërisë, ndërsa i vetmi që duket se ka thënë jo, kjo dhe për shkak të moshës dhe vendosjes për të mbyllur karrierën, është Ermal Kuqo. “Më duhet të falënderoj, – ka thënë Kostantinides, – edhe presidentin Ponari për besimin që pati ndaj meje, ndërsa unë jam i bindur se do të jap 1,000 % për të mirën e kësaj kombëtareje.”

“Unë jam i përgatitur për ta marrë këtë ekip, ndërsa kundërshtarët kanë trajnerë të fuqishëm, por dhe lojtarë që luajnë deri në NBA, – ka vijuar trajneri aktual i SIGAL Prishtinës, që militon në Superligën e Kosovës në basketboll, por edhe në Ligën Ballkanike të Basketbollit për Meshkuj (BIBL). – Atëherë detyra jonë është që të jemi agresiv në fushë, si në mbrojtje, ashtu dhe në sulm. Ajo që më bën optimistë në punën time është se të gjithë lojtarët janë treguar të gatshëm për të ardhur.”

Por Konstantinides, teksa ka qenë i pranishëm edhe në finalet e Kupës së Shqipërisë në Shkodër, është i ndërgjegjshëm për nivelin që prodhon basketbolli në Shqipëri. “5-6 vitet e fundit unë kam ndjekur disa kampionate në kërkim të lojtarëve për ekipet që drejtoj, – ka thënë qiprioti. – Por më duhet të them se nuk niveli i viteve të kaluara, ndërsa nga i pari deri tek i fundit janë të gjithë njësoi. Megjithatë në kombëtare të gjithë do të jenë të barabartë e dera do të jetë e hapur për të gjithë”.

Eurobasket 2017

Grupi F

Kalendari i kombëtares së meshkujve:

31 gusht                    Gjeorgji – Shqipëri

3 shtator                     Shqipëri – Mali i Zi

7 shtator                     Sllovaki – Shqipëri

10 shtator                  Shqipëri – Gjeorgji

13 shtator                  Mali i Zi – Shqipëri

17 shtator                  Shqipëri – Sllovaki