ASNN – Largimet e dy elbasanaseve Valbona dhe Anjeza Popa nuk janë ndjerë në ekipin e Stavrion Lakos, që me vajza tërësisht korçare ia ka dalë të jetë e suksesshme përballë durrsakeve. Korçaret e drejtuara nga trajneri Stavrion Lako në portë kishin vendosur një mbrojtëse, por që gjithsesi ia kanë dalë, teksa duhet theksuar se fitorja e djeshme ka qenë më shumë se e merituar nga ana e vajzave nga Korça.
Në këtë mënyrë faza e dytë dhe më konkretisht viti 2016-të ka nisur me këtë fitore të pastër, ndërkohë që duhet thënë edhe se ndeshja thuajse është luajtur në gjysmëfushën e Teutës pas presionit të vazhdueshëm prej 90 minutash që bëri Skënderbeu.
Edhe pse qysh në nisje, të gjitha korçaret janë hedhur në sulm duhet thënë që goli i parë do të vinte vetëm në minutën e 26-të, teksa, pas një krosimi nga e majta e Myrtollarit, është Kasa që kalon vendaset në epërsi. Deri në përfundim të pjesës së parë shifrat mbeten të pandryshuara dhe u mendua se në pjesën e dytë Teuta do të bënte diçka, qoftë edhe për atë se kishte erën e fortë në favor. Por është Skënderbeu që në 45 minutat e dyta nuk fal duke shënuar edhe 4 herë të tjera. 14-vjeçarja Joana Niçku, një futbolliste shumë e talentuar e Skënderbeut, shënon dy gola në harkun kohor të 5 minutave.
Kështu, në minutën e 71-të rezultati do të ishte 3-0 në favor të vendasve. Shënon edhe një nga më të mirat e Skënderbeut, Klarita Myrtollari në minutën e 70-të, ndërkohë që nuk mund ta mbyllte pa dygolësh edhe Sabina Kasa, që mbyll goleadën e Skënderbeut në minutën e 73-të. 5-0 do të përfundonte ndeshja e djeshme e Skënderbeut në shtëpi ndaj durrsakeve duke treguar qartë se, edhe pse me dy largimet kryesore nga ekipi, me vajza “Made in Korça” Skënderbeu sërish ia del.
Skënderbeu – Teuta 5-0
Shënuese: Kasa 26′, 73′, J. Niçku 56′, 61′, Myrtollari 70′
Skënderbeu: Zere, Shkëmbi (Muçollari 63’), Kullira, Zizolli, Demollari, Kasa, M. Niçku, Myrtollari, Sula (Morava 23’), Qylalli, J.Niçku. Trajner: S. Lako
Teuta: Hazizi, Çela, Selanji, Canga, Hysaj, Dedgjonaj, Zotkaj, Xhymerti, Kërtusha (Xheçi 51’), Malaj (Ibërhasa 66’), Koxha. Trajner: A. Doraci
Gjyqtare: E. Rusta, E. Kume, M. Salla (Elbasan)
Karton i verdhë: Zere
