ASNN – Partizani ka mposhtur Tiranën me rezultatin 2-0, në takimin e zhvilluar të premten në mbrëmje dhe të sjellë për sportdashësit drejtpërdrejt nga Rrjeti i Radio-Televizionit Shqiptar. Dy gola brenda 12 minutave të parë u kanë dhënë të kuqve kryeqytetas fitoren në derbin e 144-t, duke shkurtuar, të paktën për momentin, në një pikë të vetme largësinë që e ndan nga Skënderbeu kryesues.
Derbi nr. 144 i kryeqytetit shqiptar, midis Partizanit dhe Tiranës, është ngjyrosur sërish me të kuqe, pasi skuadra e drejtuar nga trajneri italian, Andrea Agostineli, ka fituar me rezultatin 2-0 dhe ka shkurtuar, të paktën për momentin, në një pikë të vetme largësinë që e ndan nga Skënderbeu kryesues.
Ndeshja që u luajt në Stadiumin Kombëtar “Qemal Stafa” në kryeqytet dhe, sikundër çdo veprimtari madhore sportive kombëtare, është sjellë për sportdashësit drejtpërdrejt nga Rrjeti i Radio-Televizionit Shqiptar, ka nisur në mënyrën më të mirë të mundshme për të kuqtë.
Pas vetëm 5 minutash lojë, Sukaj do të përfitojë më së miri nga një harkim i saktë i Fejzullahit dhe do të godasë me kokë brenda zonës së rreptësisë dhe do të përshëndesë rrjetën. Tirana është tulatur dhe, brenda 6 minutash, do të pësojë edhe një gol tjetër, këtë herë nga krahu i majtë i sulmit të të kuqve, kur një goditje e lirë është devijuar me kokë në rrjetë nga Fazlliu.
Partizani kryeson me shifrat 2-0 pas vetëm 12 minutash lojë dhe Tirana është goditur aq rëndë, saqë nuk do të arrijë të reagojë në pjesën e parë, duke mos e rrezikuar portën e të kuqve. Pjesa e dytë do të sjellë një karton të kuq për të sapofuturin Elis Bakaj, i cili do ta lërë kështu skuadrën e tij me 10 lojtarë për mëse një gjysmë ore lojë.
Në inferioritet numerik, por edhe në disavantazh të dy golave, Tirana nuk arrin të reagojë dhe Partizani korr kështu rezultatin e 8-të pozitiv radhazi në derbi, duke mbajtur gjallë shpresën për titull.
