Sekretari Spahiu: Nëse do të jetë në tre vendet e para të peshës deri në 97 kg, atëherë nuk do të ketë nevojë të marrë pjesë në turnetë kualifikuese për Lojërat Olimpike “Rio de Zhaneiro 2016”. Përtej kësaj, pjesëmarrja e Egzon Shalës në emër të Shqipërisë në këtë Kampionat Evropian është e rëndësishme jo vetëm për të, por dhe për mundjen, që kërkon kështu të kualifikojë një sportist me normë për në Lojërat Olimpike “Rio de Zhaneiro 2016”.

“E gjithë ideja, – thotë sekretari i përgjithshëm i Federatës Shqiptare të Mundjes, Ndriçim Spahiu, – është renditja në tre vendet e para që siguron jo vetëm medaljen, por dhe pjesëmarrjen me normë për në Lojërat Olimpike. Sepse kështu nuk do të ketë nevojë të pjesëmarrjes në tre turnetë kualifikues, që janë në Zrenjanin të Serbisë, në Mongoli dhe në Stamboll të Turqisë. Ne shpresojmë që Shala të arrijë tek medalja dhe tek kualifikimi.”

“Është shumë e rëndësishme për ne që të kemi të paktën një sportist me normë kualifikimi dhe kemi besim tek Egzon Shala”, – ka përfunduar nr. 2 i organizmit që qeveris mundjen shqiptare. Egzon Shala është medalist i bronztë në Lojërat Mesdhetare të Mersinit më 2013 dhe ka marrë vendin e 7-të në Kampionatin Botëror më 2014. Këto rezultate, së bashku me arritjet në disa turne të tjerë, të bindin që Egzon Shala si i vetmi përfaqësues i mundjes shqiptare në Evropianin e Rigës do të jetë aq i suksesshëm sa kërkojnë drejtuesit e Federatës.