Në fakt nuk ka qenë një ndeshje e lehtë për Farka Volejin, e cila ka shfaqur vështirësi, aq sa disa herë i është dashur trajnerit Dritan Bardhi për t’i bërtitur të tijve që të ktheheshin në lojë. Madje, për një goditje topi në nervozizëm e sipër për shkak të gabimeve të lojtarëve të tij, ai është ndëshkuar me karton të verdhë nga ndërkombëtarja Rudina Omari.

Fitorja e Farka Volejit ka qenë e vështirë, sepse Teuta me një grup lojtarësh të përvojësh si Aldo e Jurgen Dashi, Ani Vora, Kolea, Moku, Uruçi dhe Nazifi, tashmë i kthyer në një lojtar të lirë që në gjuhën e volejbollit quhet libero, arrin të fitojë setin e parë 23-25. Por vetëm kaq, Farka Voleji është në udhëheqje të rezultati në setin e dytë, që e fiton 25-20.

E njëjta situatë edhe në setin e tretë; 8-7, 16-14, 19-15 dhe 25-16. Teuta duket sikur është zgjuar në setin e katërt, ndërsa ka udhëhequr deri në 11-13. Dhe pushimi i Bardhit e kthen në lojë skuadrën, e cila në pushimin e dytë teknik është në epërsi 16-14. Mandej 18-15 dhe në fund 25-17 e krejt ndeshja 3-1, ndërsa Farka Voleji ka rrëmbyer vendin e katërt, që mbahej deri në javën e dymbëdhjetë nga Teuta.

Pikëshënuesi më i mirë i ndeshjes ka qenë Redi Koçi i Farka Volejit me 18 pikë i ndjekur nga Metani, po i Farka Volejit me 15 pikë, si dhe Osman Qepa i Farka Volejit, apo Jurgen Dashi dhe Moku të Teutës me 12 pikë. Në bllok ka dalë fitues Qepa dhe Bajrami të Farka Volejit me nga 3 mure fituese, kurse në shërbim Moku i Teutës me 3 të sakta.

Në total, në 4 sete, Farka Voleji ka realizuar 98 pikë prej të cilave 71 pikë vetë, kurse 27 pikë kanë ardhur nga gabimet e durrsakëve. Në krahun tjetër Teuta në katër sete ka realizuar 78 pikë prej të cilave 59 pikë vetë, kurse 19 pikë kanë ardhur nga gabimet e Farka Volejit. Ndaj dhe kjo e djeshmja konsiderohet fitore karakteri për djemtë e Dritan Bardhit.

Farka Volej – Teuta              3-1

(23-25, 25-20, 25-16, 25-17)

Farka Volej: Deliu, Koçi, Qepa, Metani, Nimani, Bërdufi (L), Bajrami / Hodaj, Vllaçaj, Plaku. Trajner: D. Bardhi

Teuta: A. Dashi, J. Dashi, Kolea, Moku, Uruçi, A.Vora, Nazifi (L) / E. Vora. Trajner: L. Marangoni

Gjyqtarë: R. Omari, T. Zguri (Tiranë)

Ndihmës: R. Ekmekçiu (Elbasan), L. Nurçe (Tiranë)

Kampionati Kombëtar

i Volejbollit – Meshkuj

Java e 13-të

(29 shkurt-2 mars 2016)

Të hënën:

Farka Volej – Teuta             3-1

Tirana – Vllaznia                  2-3

Skënderbeu                          pushim

Të mërkurën:

Elbasani – Studenti             (ora 18:00)

Renditja

Nr.       Skuadra         N.        F.         H.        Setet               Pikë

1. Vllaznia 12        9          3          29-17              26
2. Tirana 11        7          4          26-14              23
3. Studenti 10        8          2          26-12              22
4. Farka Volej 11        6          5          22-18              18
5. Teuta 11        6          5          23-22              17
6. Skënderbeu 11        2          9          8-28              6
7. Elbasani 10        0          10        7-30              2