Partizani, ndryshe nga çfarë e kishte parashikuar, i ka hasur “sharra në gozhdë” me Elbasanin në ndeshjen e djeshme, që është luajtur në sallën kryesore të “Asllan Rusit”. Një ndeshje që është fituar nga të kuqet e Roland Tares vetëm atëherë kur Elbasani është dorëzuar dhe nuk ka pasur më dëshirë për reagim, veçanërisht në setin e katërt. Nga një fillim i vrullshëm i Partizanit, që setin e parë e ka fituar 25-11, përmbysja e Elbasanit është në të njëjtat shifrat në setin e dytë.

Madje nëse do të kishte pasur më tepër forcë, Elbasani i Rudina Garunjes, mbështetur fort tek Faqolli e Shadini, mund ta kishte marrë setin e tretë, që Partizani e ka fituar në pikët shtesë, 27-25. I katërti më pas nuk ka lidhje me të gjithë lojën e prodhuar deri në atë, sepse të kuqet e kanë fituar atë sa hap e mbyll sytë, 25-9. Në këtë ndeshje pikëshënuesja më e mirë ka qenë Faqolli i Elbasanit me 18 pikë.

Ajo është ndjekur nga Shaba e Partizanit me 15 pikë, Reka e Partizanit 13 pikë dhe Meçorapoj e Partizanit 11 pikë. Në bllok ka dalë fituese Kamolli e Elbasanit me tre mure fituese, kurse në shërbim është Gongu i Partizanit me gjashtë të sakta. Në total në katër sete Partizani shënoi 102 pikë, prej të cilave 66 vetë, kurse 36 pikë kanë ardhur nga gabimet e Elbasanit që në fakt e kanë pranuar se ndeshjen e kanë dhuruar.

Në krahun tjetër Elbasani në katër sete ka realizuar 70 pikë, prej të cilave 51 pikë vetë, kurse 19 pikë kanë ardhur nga gabimet e Partizanit. Një trepikësh me vlerë ky për Partizanin e trajnerit Tarja, që e mban me shpresë për një vend në “play-off”-in final të titullit.

Partizani – Elbasani                        3-1

(25-11, 11-25, 27-25, 25-9)

Partizani: Reka, Shehu, Shaba, Gongu, Meçorapoj, Xhaferraj, Shera (L) / Goxhaj, Kaçani, Balla, Fetaj. Trajner: R. Tarja

Elbasani: Kokuja, Kulla, Faqolli, Kamolli, Garunja, Gjeli (L), Shadini / Beshiri, Bella, Cërriku. Trajnere: R. Garunja

Gjyqtarë: Ç. Kojku, K. Agolli (Tiranë)

Kampionati Kombëtar

i Volejbollit – Femra

Grupi A1

Java e 9-të

(27-29 shkurt 2016)

Të shtunën:

Flamurtari – Barleti Volej    0-3

Skënderbeu – Vllaznia       3-0

Partizani – Elbasani                        3-1

Të hënën:

Tirana – Teuta                      (ora 16:00)

Renditja

Nr.       Skuadra         N.        F.         H.        Setet               Pikë

1. Barleti Volej 9          9          0          27-1                27
2. Tirana 8          7          1          22-3                21
3. Skënderbeu 9          7          2          21-10              19
4. Partizani 9          5          4          15-16              15
5. Vllaznia 9          3          6          12-18              10
6. Teuta 8          3          5          12-16              10
7. Elbasani 9          1          8          5-24              3
8. Flamurtari 9          0          9          1-27              0