ASNN – Luiza Gega është kurorëzuar sërish kampione e Ballkanit në garën e 1,500 metrave të Salla të Mbyllura, që u zhvillua sot në Stamboll të Turqisë. Atletja shqiptare,e cila prej disa javësh stërvitet në Kenia për Olimpiadën “Rio 2016”, ka shpërthyer në garën e sotme, duke regjistruar kohën 4 minuta, 6 sekonda e 89 të qindtat. Kjo kohë në fakt përbën edhe një thyerje me afro një sekondë, të rekordit të deritanishëm kombëtar, të cilin e mbante vetë sportistja shtatshkurtër, me kohën 4 minuta, 7 sekonda e 84 të qindtat, të vendosur në vitin 2014.

Në fakt, sipas sqarimit që presidenti i Federatës Shqiptare të Atletikës, Gjergj Ruli, ka dhënë ekskluzivisht për AlbanianSport.com, koha e re konsiston në një përmirësim edhe më të madh sesa koha e regjistruar nga Gega në Botërorin e shkuar të Sallave të Mbyllura. Kjo kohë e re e rendit Luiza Gegën praktikisht të 5-tën në botë dhe jep shpresë për një përfaqësim të shkëlqyer të saj, si në Evropianin e Amsterdamit në Holandë, si në Botërorin e Portlendit në SHBA, por edhe në Lojërat Olimpike të verë në Brazil.

Për më tepër, trajneri Taulant Stërmasi ka shpejguar për AlbanianSport.com, Luiza Gega ka thyer rekordin ballkanik të kësaj disipline në salla të mbyllura, që ishte në fuqi që nga viti 1992. Koha e vendosur nga rumunia Melinte, e cila do të linte mjaft prapa atleten e njohur shqiptare, Pavlina Evro, ishte 4 minuta, 7 sekonda e 1 të qindtat, ndërsa po kjo sportiste e mban rekordin e kësaj gare edhe në mjedise të hapura me 3 minuta e 53 sekonda. “Me pak fjalë, – ka sqaruar Stërmasi, – Luiza Gega ka bërë garën më të shpejtë të 1,500 m në salla të mbyllura në historinë e atletikës ballkanike.”