ASNN – Që ai është i kërkuar dhe konturet e tij si futbollist po kapërcejnë kufinjtë e një klubi i Borusia e Mënshengladbahut, kjo nuk është ndonjë risi, ashtu sikundër nuk kanë qenë surprizë emrat e klubeve të mëdhenj me të cilat është përmendur emri i tij për një transferim të mundshën.

Por ajo që raporton faqja në Internet, “transfersource.com”, se Granit Xhaka ka nënshkruar dje një parakontratë me Liverpulin, është një goditje në merkato. Faqja në fjalë bazohet, sipas saj, në raportimet e fundit të mediave gjermane, por mbetet sidoqoftë një faqe jo dhe aq e besueshme në raportimet e saj.

“Bazuar në raportimet në Gjermani, Granit Xhaka ka nënshkruar sot (dje) një para-kontratë me Liverpulin dhe zyrtarizimi i saj do të bëhet para ndeshjes me Augsburgun”, shkruan “transfersource.com”, që në fakt është më tepër një “blog” sesa një media e mirëfilltë sportive.

Granit Xhakaj ishte përfolur për një interesim edhe të Arsenalit, Mançester Sitit dhe Bajernit të Mynihut, por duket se Liverpuli ka fituar garën për të, dhe mesfushori i i Borusias së Mënshengladbahut me tipare mbrojtëse nga Kosova, do ta veshë fanellën e kuqe që nga vera e këtij viti.