Klubet e Kategorisë Superiore të Kampionatit Kombëtar të Futbollit të Shqipërisë po gëzojnë përfitime të shumëfishta nga futbollistët kosovarë. Në Shqipëri, lojtarët nga Kosova llogariten si vendas dhe kjo ka bërë që dyert e skuadrave të Shqipërisë të hapen “kanat më kanat” për lojtarët nga Kosova.
Megjithatë, e përditshmja e mirënjohur kosovare, “Koha Ditore”, ka ngritur shqetësimin se, thuajse të gjithë lojtarët nga klubet kosovare në klubet e Shqipërisë kalojnë pa dëmshpërblim: ose si lojtarë të lirë ose klubet i lirojnë pa dëmshpërblim, për të mos penguar zhvillimin e tyre.
Lojtarët nga Kosova japin kontribut të madh në fushë për ekipet e Shqipërisë, ndërsa janë këto klube ato që përfitojnë edhe nga shitja e lojtarëve kosovarë në ekipe të ndryshme evropiane. Për shembull Skënderbeu ka përfituar nga shitja e Bernard Berishës tek Anzhi.
Së fundi, klubet e Shqipërisë kanë “shpikur” një mënyrë tjetër për të përfituar nga lojtarët kosovarë. Partizani i Tiranës është i pari që ka përfituar për “zhvillim të lojtarit”, përkatësisht për zhvillim të Amir Rrahmanit. Futbollisti 21-vjeçar ka luajtur për Partizanin nga viti 2013 deri në pranverë të vitit të kaluar.
Në verë u transferua te Spliti i Kroacisë, ku po aktivizohet me sukses. Tek Spliti kaloi si lojtar i lirë, pasi kontrata me Partizanin i skadoi. Por Partizani së fundi ka fituar një gjyq me Splitin në FIFA, në emër të zhvillimit të lojtarit. Mediat e Tiranës kanë raportuar se Partizanit do t’i takojnë 70 mijë euro në emër të zhvillimit që i ka bërë futbollistit.
Por, sikundër thekson e përditshmja e mirënjohur kosovare, “Koha Ditore”, zhvillimi i vërtetë i lojtarit është bërë në Kosovë, në Shqipëri ka shkuar si i rritur dhe jo lojtar nën moshë. Për këtë arsye, e përditshmja në fjalë ngre pyetjen nëse klubet e Kosovës, të mbetur në kurthin e mosnjohjes ndërkombëtare, po zhvaten nga klubet e Shqipërisë.
