ASNN – Kupa “Alfed Ziaji” 2016 në futbollin e sallës ka ulur siparin sot me finalen e madhe, të diskutuar midis dy rivaleve që i kanë dhënë tonin këtij sporti deri sezonin e shkuar, Flamurtarit dhe KS “Ali Demit”. Kjo finale, e zhvilluar në Pallatin e Sportit “Flamurtari” të Vlorës ka folur për kryeqytetasit, të cilët kanë fituar me rezultatin bindës, 6-3, duke rrëmbyer kështu edhe trofeun që mban emrin e atij që mund të quhet padyshim edhe “babai” i futbollit të sallës në Shqipëri.

Në çerekfinalet, Flamurtari pati mposhtur sfidën e rivales tjetër nga kryeqyteti, Tiranën, të cilën e mundi 2-0, duke vijuar të triumfonte edhe në gjysmëfinale ndaj një pretendenteje tjetër, Vllaznisë, me rezultatin e ngushtë 2-1. Nga ana e tyre, “alidemsat” patën fituar 3-2 në gjysmëfinale ndaj skuadrës tjetër të Vlorës, Edros, dhe me të njëjtat shifra edhe në gjysmëfinale ndaj Titans. Kjo bëri që të dyja skuadrat të vinin në finalen e sotme të karikuar për sukses dhe për të rrëmbyer kurorën.

Sidoqoftë, faktori “Bllumbi” ka bërë diferencën për kryeqytetasit, pasi ai ka shënuar plot 4 herë brenda 33 minutave të para, duke shtruar “shinat” për fitoren e skuadrës së tij. Ai realizoi në minutën e 3-të dhe, ndonëse Maze barazoi përkohësisht shifrat 5 minuta më pas, vijoi të plotësonte 3-golëshin e tij në minutat 10 dhe 18. Maze shkurtoi deficitin në 2-3 për vlonjatët me golin e tij të dytë në minutën e 25-të, por Jokoviçi riktheu epërsinë dygolëshe të KS “Ali Demit” me golin e realizuar në minutën e 30-të, përpara se Bllumbi të shënonte golin e tij të 4-t në minutën e 33-të.

Ndonëse S. Qopekaj dha shpresë për një ringjallje të Flamurtarit me golin e realizuar në minutën e 36-të, gjithçka shuhet në fund, kur malazezi tjetër, Aloviç, vulosi shifrat në 6-3. KS “Ali Demi” bëhet kështu fituesi i edicionit të parë të trofeut “Alfred Ziaji” në futbollin e sallës, veprimtari të cilët presidenti i Shoqatës Sportive të Minifutbollit Shqiptar, Klodian Kadiu, ka premtuar ta organizojnë çdo vit, në të njëjtat data, por në qytetet e ndryshme, në nderim të kësaj figure.

Kupa “Alfed Ziaji” 2016

Futbolli i Sallës

Çerekfinalet:

Flamurtari – Tirana              2-0

Titans – Birra “Kaon”           8-4

Vllaznia – Teuta                   3-0 (në tavolinë)

KS Ali Demi – Edro Vlora   3-2

Gjysmëfinalet:

Flamurtari – Vllaznia           2-1

KS Ali Demi – Titans           3-2

Finalja:

Flamurtari – KS “Ali Demi”  3-6

Shënues: Maze 8’, 25’, S. Qopekaj 36’ / Bllumbi 3’, 10’, 18’, 33’, Jokoviç 30’, Aloviç 40’