“Përpara shumë vitesh, – nis të rrëfejë Fatmir Cuka nga SHBA-ja, – thuhej se që të bëhesh basketbollist duhet të kesh një top dhe një kosh. E mbi të gjitha duhet të kesh dëshirën për t’u stërvitur. Thënia padyshim qëndron edhe tani, por kohët kanë ndryshuar, ashtu siç kanë ndryshuar dhe kushtet e zhvillimit të basketbollit në vend. Por mbi të gjitha kanë ndryshuar dhe vetë njerëzit, si dhe mentaliteti i tyre”. Dhe për Cukën baza e së ardhmes së zhvillimit të basketbollit janë fëmijët dhe mënyra e përgatitjes së tyre.
“Dëshira tek fëmijët për t’u bërë sportistë qëndron, – thekson ai. – Fëmijët nuk mbarojnë. Një brez ikën e një brez vjen, sepse ky është ligji natyral i jetës. Por çfarë bëjmë ne për këta sportistë të rinj? Kjo duhet të jetë filozofia jonë e zhvillimit të basketbollit, ndërsa do ta përmbledh në tre pika; kualifikim trajnerësh, kushtet sportive dhe pjesëmarrja në kompeticionet sportive”. E Cuka e ka të qartë se Shqipëria do të jetë pjesëmarrëse me pesë ekipe në kampionatet evropiane nga Nën-16-vjeçarët deri tek Nën-20-vjeçarët. Dhe këtë gjë e quan hap pozitiv.
“Më duhet të pranoj se shumë gjëra kanë ndryshuar në kahun pozitiv për basketbollin shqiptar, – ka pohuar ai. – Por ka edhe ende pika negative. Të marrësh pjesë në arenën ndërkombëtare është gjithmonë vlerë dhe eksperiencë. Dhe pjesëmarrjen në këto aktivitete unë do ta ndaja në dy aspekte. Së pari kur flitet për ekipin kombëtar A them që duhej të ishte vazhduar puna dhe jo të rrinim pa bërë ndeshje gjatë. Sepse kishim një bërthamë të mirë në kombëtare që nga Kuqo, Shima, Bushati, Ndoja, të cilët janë lojtarë të parametrave ndërkombëtarë.”
“Pa harruar këtu edhe lojtarë si Vogli, Aliaj, Hysenagolli, të cilët përbëjnë grupin, i cili bëhet një ekip mjaft i fortë dhe për të rivalizuar me kundërshtarët, – ka vijuar ish-trajneri kuqezi. – Eksperiencat e Gjermanisë, Turqisë dhe Rusisë kanë treguar se fitorja nuk vjen me një muaj grumbullim. Por me një grup lojtarësh që trajnohen gjatë dhe bëjnë ndeshje për një periudhë të vazhdueshme. Sa për moshat, pjesëmarrja e vjetshme ishte pozitive në arenën ndërkombëtare, por për nivelin e infrastrukturës dhe të basketbollit që kemi do të ishte më mirë të merrnim pjesë nëpër festivale, apo kupa verore.”
“Sepse në vend që të bëjmë 2-3 ndeshje dhe të rrihemi me rezultate të thella, do të kishin në këto turne miqësor 8-12 ndeshje dhe të gjithë do të kishin mundësi të luanin dhe ne do të fitonim një shumicë lojtarësh për të ardhmen e basketbollit”, – ka theksuar Fatmir Cuka, i cili analizën e tij e mbyll: “E them këtë për momentin që është duke kaluar basketbolli”.
