ASNN – Amullia e krijuar nga pezullimi i drejtuesve të futbollit botëror dhe atij evropian u ka dhënë shkas klubeve kryesore të kontinentit, që të kërkojnë më tepër favore nga Liga e Kampioneve, çka natyrisht përkthehet edhe në më tepër të ardhura dhe përfitime financiare. Mbetet për t’u parë në javët në vazhdim sesa do t’u dorëzohet UEFA kërkesave të klubeve të mëdhenj sa i përket Ligës së Kampioneve.

Veprimtaria më prestigjioze e klubeve të kontinentit, Liga e Kampioneve, mund t’u nënshtrohet shumë shpejt ndryshimeve rrënjësore, sidomos përsa i përket pjesëmarrjes së skuadrave të mëdha të futbollit evropian. Amullia e krijuar nga pezullimi i drejtuesve të futbollit botëror dhe atij evropian u ka dhënë shkas klubeve kryesore të kontinentit, që të kërkojnë më tepër favore nga kjo veprimtari, çka natyrisht përkthehet edhe në më tepër të ardhura dhe përfitime financiare.

Fakti që skuadra të fuqshme si Çellsi në Angli që rrezikon pjesëmarrjen në Ligën e Kampioneve sezonin e ardhshëm apo Milani në Itali, që ka dy sezoneve që nuk merr pjesë fare në asnjë veprimtari kontinentale të klubeve, ka bërë që Shoqata e Klubeve të Futbollit Evropian (ECA), të kërkojë më tepër siguri për anëtarët e saj. Mbetet për t’u parë në javët në vazhdim sesa do t’u dorëzohet UEFA kërkesave të klubeve të mëdhenj sa i përket kësaj veprimtarie.