ASNN – Në fjalën e tij hapëse, presidenti i Federatës Shqiptare të Peshëngritjes (FSHP), Elez Gjoza, i ka uruar suksese kombëtares, e cila për gati dy muaj e gjysmë do të përgatitet në Shtërmen. Më tej numri një i Federatës, Elez Gjoza, ka thënë se presin më shumë nga të gjithë. “Sepse pretendimet tona janë të mëdha për Evropianin e Norvegjisë, atje ku kërkojmë që të jemi në një nga tre vendet e para në renditje, – ka thënë ai. – Ndaj për të arritur këtë rezultat duhet disiplinë në stërvitje, sepse ky është çelësi i suksesit.”

“Fjala e trajnerëve tuaj do të jetë ligj për ju dhe do të respektohen ata të parët në këtë grumbullim, – ka vijuar kreu i FSHP-së. – Ne jemi munduar t’ju krijojmë kushte sa më të mira dhe shumë cilësore si në palestrën ku do të stërviteni, që është e bollshme për të gjithë, ashtu dhe në ambientet e hotelit ku do të qëndroni. Kërkoj seriozitet nga të gjithë sportistët, pasi jeni ajka e shtangës dhe nuk duhet të thyeni rregullat e përgatitjet. E kjo që nga oraret e zgjimit e deri tek ato të stërvitjes, pasi vetëm kështu ecet përpara dhe arrihet synimi që kemi.”

“Falënderim i veçantë i shkon trajnerit pritës Leonard Toska, që është i palodhur, dhe gjithashtu dhe peshëngritësit Briken Calja, nga i cili presim shumë, – ka theksuar Gjoza. – Për sa i përket problemit të dopingut ne do të marrim të gjitha masat si Federatë, atje ku kemi caktuar mjekun Mel Ostreni për këtë gjë, ndërsa 20 ditë përpara garës do të vijnë dhe testet e juaja të antidopingut. Kush do të ketë probleme, nuk do të niset në Evropian. Sa për trajtimin ushqimor, ai do të jetë i bollshëm me një çmim ditor 4500 lekë të rinj për person në ditë. Që do të thotë shumë e bollshme dhe askujt nuk do t’i mungojë gjë.”