ASNN – Në këtë grumbullim të parë të përfaqësueses së Shqipërisë në peshëngritje, që do të mbahet në Shtërmen, ka qenë i pranishëm presidenti i Federatës Shqiptare të Peshëngritjes, Elez Gjoza, si dhe Sekretari i Përgjithshëm i këtij organizmi, Agron Haxhihyseni. Në hollin e hotelit “Xhelili”, presidenti Gjoza ka bërë një takim me sportistët, ndërsa ka kërkuar prej tyre disiplinë në përgatitje dhe një sjellje korrekte në të gjitha ambientet ku do të stërviten e ku do të qëndrojnë. “Kjo është kryesorja për ne, pasi kem pretendime të mëdha në këtë garë evropiane”, – ka deklaruar ai.
“Kështu që duhet të stërviteni sipas orareve të caktuara e t’i zbatoni ato me shumë rigorozitet, – ka vijuar kreu i peshëngritjes shqiptare. – Jemi një Federatë që në 43 vjet peshëngritje kemi marrë 324 medalje ndërkombëtare. E këto nuk janë pak, ndaj dhe ju duhet të vazhdoni rrugën e sukseseve të këtyre medaljeve edhe në këtë Evropian. Do të stërviteni me dy seanca në ditë, paradite dhe pasdite, në palestrën e Shtërmenit e më pas do të akomodoheni në këtë hotel ku jeni tani që i ka të gjitha kushtet e nevojshme për një sportist cilësor.”
“Të mërkurën do të kompletohet i gjithë ekipi dhe do të vazhdojnë intesivisht stërvitjen pa ndërprerje, – ka sqaruar Gjoza. – E kjo nga e hëna deri të shtunën paradite e më pas do të shpërndaheni nëpër shtëpia për t’u rigrumbulluar përsëri në fillimin e javës. Kush nuk do të paraqitet deri të mërkurën në orën 14:00, që është dhe afati i fundit i grumbullimit të kombëtares, do të përjashtohet nga ekipi, si dhe kush do të thyejë rregullat e stërvitjes, apo do largohet pa leje nga hoteli, përsëri do të largohet nga kombëtarja.”
“Do të zhvillojmë Kupën e Shqipërisë dhe kush do të paraqitet më mirë, ose më saktë kush do të jetë sportisti, apo sportisja më e mirë e aktivitetit do të jetë në Evropian. Kështu që forca, përpara keni një punë të madhe për të bërë”, – ka përfunduar Presidenti i Federatës Shqiptare të Peshëngritjes, Elez Gjoza, duke folur përpara sportistëve.
