Hera e parë për të pestin në renditjen botërore të tenisit që eliminohet që në turin e parë në Australi, kurse amerikania, edhe pse është në dhjetëshen e parë të renditjes, ende s’po vjen në formë. Dita e dytë e Turneut të Hapur të Australisë (Australian Open), apo turneut të Melbërnit, që një ndër më të rëndësishmit në aktivitetet madhore të tenisit për 2016-ën, shënoi surprizën më të madhe. Në turin e parë, si asnjëherë tjetër, është eliminuar Rafael Nadali, që është i 5-ti në renditjen botërore, si dhe Venus Uilliamsi e klasifikuar në dhjetëshen e parë të tenisteve në botë.
Numri 5 i renditjes botërore u mund në derbin spanjoll nga Fernando Verdasko me rezultatin 2-3, në një ndeshje në të cilën ishte shumë pranë fitores. Për Nadalin kjo është hera e parë që eliminohet në turin e parë në turneun e Melbërnit dhe hera e dytë në turnetë e mëdha dhe të rëndësishëm të tenisit. Verdasko fitoi setin e parë 7-6, por Nadali iu përgjigj duke fituar 2 të tjerët 6-4 dhe 6-3. Madrileni barazoi gjithçka duke fituar setin e katërt 7-6 dhe ndeshja shkon në setin final.
Në këtë fraksion të lojës, Nadali mori kryesimin në 2-0, por nuk e ruajti dot këtë epërsi. Verdasko e theu 3 herë Nadali me shërbimet e tij për të fituar në fund këtë set 6-2 dhe krejt ndeshjen 3-2. Krejtësisht ndryshe ndodhi me Andi Mërrejin, që u kualifikua me lehtësi për në turin e dytë. Tenisti britanik, hëpërhë numri 2 i botës, ishte dominues në ndeshjen me Aleksander Zverevin, të cilin e mposhti me rezultatin 3-0 me sete 6-1, 6-2, 6-3.
Në kampin e femrave, ëndrrat e Venus Uilliamsit për të fituar titullin e parë në karrierë në “Australian Open” u thyen që në raundin e parë. Tenistja amerikane u eliminua nga britanikja, Joana Konta, e cila e fitoi këtë ndeshje me rezultatin 2-0. Venusi, e rikthyer në fushat e lojës gjatë 2015, kur arriti të vendosë emrin e saj mes 10 më të mirave në renditjen e WTA-së, e kishte të vështirë të përballonte kundërshtaren e saj që i fitoi setet 6-4 dhe 6-2, në një hark kohor prej 79 minutash. U kualifikuan për në raundin e dytë edhe spanjollja Mugurusa dhe tenistja serbe Ana Ivanoviç.
