i ftuar në emisionin “Kolor” në Televizionin Shqiptar, Presidenti i Komitetit Olimpik Kombëtar Shqiptar, Viron Bezhani, e ka pranuar tashmë faktin që Shqipëria është në hartën e shteteve të dyshuara për shkak të përdorimit të substancave të ndaluara. E kjo më së shumti në peshëngritje, gjë që reflekton edhe në numrin e sportistëve të kualifikuar me normë për në Olimpiadë. “Mund të kenë kaluar një herë, por ama ky nuk është sport”, – ka deklaruar ai.

“Mos harroni që është fenomen botëror, ndërsa dënuar atletika ruse, atje ku Rusia si shtet rrezikon të përjashtohet nga të gjitha ngjarjet sportive ndërkombëtare, – ka vijuar ish-mundësi. – Në Gjermani dënimi për përdorimin e substancave të ndaluara shkon deri në tre vjet. Ne jemi duke u munduar që nëpërmjet edukimit në shkolla, shtimit të orëve të fizkulturës dhe të bërit sport të largojmë rininë në droga dhe veset e këqia. Ne nuk na vjen mirë që goditet peshëngritja.”

“Shanset janë që në Olimpiadë të jenë Calja e Qerimaj me normë, sepse kanë përpara Evropianin e doemos duhet të ngjiten në podium, – ka pohuar Bezhani. – Por ne shpresojmë që edhe në xhudo të na bashkëngjitet një sportiste kosovare e më pas të jetë pjesë e Shqipërisë. E sigurt është se 4-6 sportistë, apo 7 do të na përfaqësojnë në Brazil”, – theksoi kreu i KOKSH-it, i cili ka bërë të ditur se sporti është promovuesi më i mirë i turizmit shqiptar.

“E kjo jo vetëm në këtë Olimpiadë, por dhe në të gjitha aktivitetet ku merr pjesë Shqipëria. Nëse vite më parë e kemi pasur të vështirë të tregojmë se është Shqipëria, apo kur të tjerë na vinin me bukë e kuzhinë me vete në Kampionatit Evropian, sot e dinë se ku ndodhet vendi ynë e këtë e bën vetëm sporti”, – ka përfunduar Presidenti i Komitetit Olimpik Kombëtar Shqiptar, Viron Bezhani.