ASNN – Klubi skocez i Sëlltikut raportohet se ka shprehur interesim për mesfushorin shqiptar të Mançester Siti, Bersant Celina. E përditshmja e mirënjohur skoceze “The Scotsman” raporton se gjatë kësaj merkatoje të janarit, Sëlltiku do të kërkojë huazimin e Celinës, i cili debutoi të shtunën për Sitin në kuadër të Kupës të Anglisë (FA Cup).
Në një intervistë për faqen norvegjeze “vg.no”, vetë Celina ka konfirmuar se Mançester Siti do ta huazojë atë te ndonjë klub i “Çampionship”-it (kategoria e dytë e kampionatit anglez të futbollit), por Sëlltiku ka shprehur menjëherë interesim për të.
“Në këtë moshë duhet të luaj rregullisht, – ka thënë Celina për faqen norvegjeze në fjalë. – Sipas gjasave, do të jepem hua. Mançester Siti do të më huazojë dhe, sipas të gjitha gjasave ,do të jetë ndonjë klub i “Çampionship”-it.”
Celina është i lindur në Kosovë, por është rritur në Norvegji, ndërsa ka luajtur për të përfaqësuesen e të rinjve të këtij vendi.