ASNN – Një ceremoni përkujtimore është mbajtur në nder të Mirjan Hakanit. Ish-kampioni i peshëngritjes është kujtuar nga të afërmit, miqtë dhe sportistë, ndërsa është shfaqur edhe një film dokumentar mbi jetën dhe arritjet e tij.

Familjarë, miq dhe sportistë ishin të pranishëm në ceremoninë përkujtimore në nder të Mirjan Hakani. Ish-sportisti, kampion në peshëngritje u nda nga jeta pak javë më parë pas një beteje të gjatë me sëmundjen në zemër.

Gjatë ceremonisë u shfaq edhe një film dokumentar me pamje, foto, intervista dhe momentet e sukseseve më të mëdha të Mirjan Hakanit gjatë karrierës së tij si sportist e më pas drejtues i sportit.

Edhe miqtë e tjerë dhe sportistët në fjalët e tyre të rastit sollën në kujtesë momente të karrierës, por edhe jetës së Mirjan Hakani, që me arritjet e tij sportive mbate titullin “Mjeshtër i Madh”.

Në përfundim të ceremonisë përkujtimore, organizatorët kishin ekspozuar titujt, trofetë dhe medaljet e fituara nga Hakani gjatë karrierës së tij.