ASNN – Në ceremoninë gala në Zyrih u nda edhe çmime të tjera, ku trajneri më i mirë i vitit u shpall Luis Enrike, i cili ishte në finale me Horhe Sampaoli dhe Pep Guardiola. Trajneri i Barcelonës është shpallur trajneri më i mirë i vitit nga FIFA, pas sukseseve me skuadrën e tij në Spanjë dhe Evropë.
Enrique ka udhëhequr skuadrën e tij drejtë 5 titujve, duke dominuar kështu futbollin evropian. Ai për këtë çmim ka mposhtur trajnerin e Bajernit të Mynihut, Pep Guardiolën, dhe atë të Kilit, Horhe Sampaoli. Luis Enrike fitoi 31.08 % të votave, Pep Guardiola, 22.97 %, ndërsa Sampaoli vetëm 9.47 %.
Ndërkaq, Karli Llojd u shpall futbollistja më e mirë për femra. Futbollistja amerikane ishte e jashtëzakonshme në vitin që shkoi, duke u shpallur edhe “kampione” e botës dhe e meritoi këtë çmim prestigjioz individual. Ajo mposhti në treshen finale dy konkurrentet e tjera, japonezen Ai Mijama dhe gjermanen Silia Shashiç.
Trajnerja më e mirë për femra u shpall Xhill Elis, e përfaqësueses së Shteteve të Bashkuara të Amerikës. Ajo i mposhti dy konkurrentët meshkuj, Mark Sampsonin, trajnerin e Uellsit, dhe Norio Sasakin, trajnerin e Japonisë. Goli më i bukur për vitin që lamë pas u zgjodh ai i shënuar nga braziliani Uendell Lira.
Ai mposhti në garë për golin më të bukur të vitit, Alesandro Florencin dhe Lionel Mesin, me një gol të realizuar “alla Play Station”. Çmimin e FIFA-s për “Lojën e Ndershme”, (Fair Play) shkoi për të gjitha organizatat e futbollit që mbështetën refugjatët në këtë vit të vështirë për ta.
Ndërkohë, është shpallur edhe ekipi më i mirë i botës për vitin 2015, që përbëhej nga Manuel Nojer; Thiago Silva, Marselo, Serxhio Ramos, Dani Alvesh; Andres Injiesta, Luka Modriç, Pol Pogba; Lionel Mesi, Nejmar dhe Kristiano Ronaldo. Portieri gjerman nuk ishte i pranishëm në këtë ceremoni.
