ASNN – Ceremonia e Topit të Artë do të mbahet sot duke filluar nga ora 18:30, ku Lionel Mesi, Kristiano Ronaldo dhe Nejmari janë kandidatët për ta fituar atë. Duke vërejtur statistikat, spikat fakti se Gjermania dhe Holanda kryesojnë në numrin e lojtarëve që e kanë fituar “Topin e Artë”. Ky çmim ka shkuar për lojtarët gjermanë dhe holandezë shtatë herë.
Gjashtë herë këtë çmim e kanë fituar futbollistët francezë, ndërsa nga pesë herë ata italian, brazilian argjentinas dhe portugezë. Ceremonia e Topit të Artë do të zhvillohet sonte në mbrëmje në Zyrih, duke filluar nga ora 18:30 dhe do të sillet për sportdashësit drejtpërdrejt nga Rrjeti i Radio-Televizionit Shqiptar. Kristiano Ronaldo është duke shpresuar që ta rrëmbejë Topin e Artë për të tretën herë me radhë.
Por ai do ta ketë të vështirë përball dyshes Lionel Mesi-Nejmar që kanë shkëlqyer në vitin që lamë pas duke fituar 5 tituj me Barcelonën. Për vitin që lamë pas, Ronaldo shijoj sukseset si “Këpuca e Artë” dhe gjithashtu u bë golashënuesi më i mirë në historinë e Realit të Madridit, por duket mbrapa dyshes magjike të katalanëve që përveç trofeve, kanë qenë të mahnitshëm me paraqitjet e tyre.
Lionel Mesi pati një vit të shkëlqyer duke i ndihmuar skuadrës së tij të rikthehet furishëm te titujt, pasi atij dështimi me trajnerin Tata Martino, dhe shihet si favoriti kryesor për ta fituar këtë çmim, që do të ishte i pesti për të në karrierë. Në anën tjetër, Nejmari po tregon se mund të jetë pasardhës i denjë i Lionel Mesit tek Barcelona, kur ky i fundit t’i varë në gozhdë këpucët e tij.
Nejmari shihet si lojtari i tretë më i mirë në botë dhe sipas analistëve, kur Ronaldo e Mesi nuk do të jenë për ta fituar këtë çmim, braziliani do të dominojë tërësisht. Në 7 vitet e fundit, këtë trofe e kanë fituar ekskluzivisht Lionel Mesi dhe Kristiano Ronaldo. Nëse edhe këtë vit e rrëmben njëri prej tyre, do të jetë viti i tetë që dy lojtarët më të mirë në botë, nuk po i lëshojnë vend të tjerëve që nga viti 2008.