ASNN – Ish-futbollisti shkodran, Armando Cungu është prezatuar sot si trajneri i ri i Vllaznisë. Ai kthehet në skuadrën shkodrane, ku kaloi pjesën më të madhe të karrierës së tij si futbollist, por edhe zëvendëstrajner më parë. Armando Cungu do të zëvendësojë kështu Armir Grimën, i cili mbuloi përkohësisht edhe rolin e trajnerit, pas dorëheqjen së Luan Zmijanit.

Stafi ndihmës do të përbëhet nga malazezi Aleksandër Madzar dhe një tjetër ish-futbollist, Avenir Dani. Një ditë më parë problemet me pagat bënë që lojtarët të bojkotonin stërvitjen, por sot morën garanci nga Bashkia se do t’i marrin paratë. Kështu, Armando Cungu prezantohet si trajner i Vllaznisë, ndërsa lojtarët marrin garanci financiare nga Bashkia.

Cungu u prezantua nga kryetarja e Bashkisë së Shkodrës, Voltana Ademi që gjithashtu garantoi futbollistët për zgjidhjen e krizës financiare. Kështu, vijnë më në fund lajme të mira edhe për Vllazninë. Një ditë pasi bojkotuan stërvitjen, futbollistët e skuadrës shkodrane u thirrën në Bashkinë e qytetit ku dhe iu bë e ditur plotësimi i dy kërkesave të tyre më të rëndësishme.

Në fillim shlyerja e detyrimeve financiare të prapambetura dhe zyrtarizimi i Armando Cungut si trajner i ri i ekipit. Pas përvojave të suksesshme te Kukësi dhe Laçi, trajneri u prezantua nga kryetarja e Bashkisë së Shkodrës, Voltana Ademi. Ulja e Armando Cungut në stolin e Vllaznisë ishte folur prej kohësh, por vetë trajneri kishte kërkuar siguri financiare përpara se të firmoste kontratën.

Megjithëse e pranon këtë sfidë, Cungu nuk gjen një mjedis aspak të mirë për të punuar. Larg emrit të saj të madh në futbollin shqiptar, Vllaznia mbylli dy vazat e para të sezonit në vendin e tetë të renditjes me vetëm 15 pikë të grumbulluara. Për këtë arsye, përveçse duhet të drejtojë skuadrën aktuale, Cungu ka kërkuar edhe forcimin e saj me blerje të reja gjatë merkatos së janarit.