Luiza Gega, atletja shqiptare e të gjitha përmasave gjigante, por dhe e kualifikuar me normën A për pjesëmarrjen e saj në Lojërat Olimpike “Rio de Zhaneiro 2016”, ka vetëm 48 orë që ka mbërritur në Iten të Kenias. Atje, së bashku me trajnerin e saj Taulant Stërmasi, rekordmenia shqiptare në 800, 1500, 3000 me dhe pa pengesa, 5000 dhe 10000 metra, do të përgatitet për nëntë javë. Dhe trajneri Stërmasi, në një rrëfim ekskluziv për “Sport Ekspres” nga Iten i Kenias, ka rrëfyer se janë dy objektiva madhore.
“Së pari Botërori i sallave të mbyllura, ndërsa ne jemi renditur në vendin e gjashtë, tashmë kërkojmë të jemi më sipër, – ka deklaruar ai. – Pse jo dhe Lojërat Olimpike në Rio, që është dalja në finale dhe më pas tentativa për të sjellë medaljen e parë olimpike.” Sigurisht që në Iten të Kenias nuk është një “shesh me lule”, apo një vend për pushime luksi. Por fakti që tashmë i dinë se si janë kushtet, edhe pse kanë vetëm 48 orë që kanë mbërritur atje, e bën më të lehtë punën e tyre. “Hëpërhë, gjërat janë të vështira, – thotë Stërmasi- sepse na duhet kohë të përshtatemi me lartësinë, zhulin, varfërinë dhe ushqimin në Kenia.
“Janë gjëra që ne i dimë dhe jemi përgatitur paraprakisht që nga nisja jonë më 5 janar, – ka pohuar trajneri. – Megjithatë na duhet kohë për t’u përshtatur 100 %. Lartësia në të cilën ndodhemi është 2400 metra mbi nivelin e detit, më lart se kurrë, dhe deri më tani stërvitja ka shkuar mirë. E thash dhe më parë se përshtatja me Kenian si vend, apo dhe me lartësinë ka vështirësitë e veta, por po shkon mirë.” Në fakt përpara nisjes për në Kenia, Luiza Gega, edhe sipas trajnerit të saj, ka zhvilluar një fazë përgatitore shumë të mirë në Tiranë.
