Federata Shqiptare e Çiklizmit e ka nisur vitin 2016 me garën e disiplinës “Mountain bike”, Tiranë-Pezë, e cila është zhvilluar duke përshkruar rrugën rreth kodrave të Baldushkut me ndërprerjen në lumin Erzen për të dalë pastaj në pikën e caktuar të binishit. Në një gjatësi prej 40 kilometrash, në një kohë me kushte atmosferike të vështira dhe me baltë, 52 çiklistët pjesëmarrës ia kanë arritur ta çojnë garën deri në fund.
Sipas Sekretarit të Përgjithshëm të Federatës Shqiptare të Çiklizmit, Alfred Tahiraj, kanë qenë tre kategori pjesëmarrësish, profesionistët, amatorët dhe kategoria e femrave, ku ishin 4 vajza. Në ceremoninë e startit të garës, e cila të dielën paradite është zhvilluar në Bulevardin “Dëshmorët e Kombit”, kanë marrë pjesë presidenti i Federatës Shqiptare të Çiklizmit, Skënder Anxhaku, ai i parqeve dhe rekreacionit në Bashkinë e Tiranës, Blendi Gonxhe.
Po kështu kanë qenë pjesëmarrës edhe drejtori i sporteve në Ministrinë e Arsimit dhe Sportit, Vladimir Gjonaj, si dhe ai i “Rally Albania”-s, Ervin Kasimati, apo i Aeronautikës, Renis Tërshana. Presidenti i Federatës Shqiptare të Çiklizmit, Skënder Anxhaku, i ka falënderuar të gjithë ata që kanë ndihmuar në mbarëvajtjen e aktivitetit, pa harruar këtu kontributin e “Tirana Bike Club”. Dhe pas katër orësh garë në baltë e në shi i pari ka dalë Ylber Sefa i Tiranës.
Pas tij kanë ardhur Isert Gjatolli dhe i treti Serdi Gjatolli. Ajo që duhet theksuar është fakti se ky është veprimtarinë e dytë i “Mountain bike” brenda një kohe të shkurtër, kur dy muaj më parë një garë e tillë është zhvilluar dhe në Dajt. Dhe nën mbështetjen e Federatës Shqiptare të Çiklizmit, e cila vitin 2016 e ka nisur pikërisht me “Mountain bike” si një disiplinë që tashmë ka dhe shtrirjen ndërkombëtare duke kërkuar sportistët e saj të specializuar.
