Tirana është kualifikuar me vështirësi për në gjysmëfinalen e Kupës së Shqipërisë në basketboll për meshkuj, sepse Elbasani i Kategorisë së Parë të Kampionatit Kombëtar të Basketbollit për Meshkuj ka bërë një rezistencë të fortë. Madje bardheblutë kanë nisur të shfaqen me arsenalin e tyre më të mirë vetëm kur gjyqtari Kasemi ka ndëshkuar tre lojtarë verdheblu me gabime teknike, kjo për protesta ndaj vendimeve të tij.

I pari ka qenë Skëndaj, i cili në një dyluftim është dëmtuar në kockën e hundës, teksa ka pësuar dhe një çarje, e cila ka sjellë dhe hemorragji. Dhe teksa linte fushën ka marrë një nga stolat që shërbejnë për t’u ngjitur në tavolinën e sekretarisë dhe e ka hedhur në mesin e fushës. E pasi janë konsultuar Kasmi e Kasemi, me vëzhguesin Cici, kanë akorduar këtë gabim teknik.

Ndërkohë që me lojtarin e dëmtuar të Elbasanit është marrë gjatë mjeku i klubit shumësportësh “Tirana”, Sabahat Kastrati, i cili i ka dhënë ndihmën e kualifikuar basketbollistit mik. E këtu duket se është prishur loja e skuadrës mike, sepse është ndëshkuar dhe Çela me gabim teknik e pas tij dhe Leka, të cilin e kanë mbajtur lojtarët e stolit për të mos vazhduar më gjatë protestat ndaj gjyqtarëve.

Megjithatë në fund, përtej këtyre problemeve, të gjithë janë ndarë paqësisht dhe Tirana e ka marrë kualifikimin për në gjysmëfinale me një paraqitje dinjitoze të Elbasanit deri në momentin që tre lojtarë verdheblu janë ndëshkuar me gabime teknike. Elbasani falë lojës së mirë së vëllezërve Çela, Uruçit, Skëndaj dhe Lekës kanë bërë rezistencë, aq sa Tirana në fund të pjesës së parë është vetëm me dy pikë diferencë epërsi, 27-25.

Të dytën e ka fituar Elbasani, 16-17 dhe në pushim Tirana është një pikë përpara, 43-42, gjë që nuk garanton suksesin. Tjetër gjë kanë qenë dy pjesët e tjera, të cilat Tirana i ka fituar 27-19 dhe 22-14 dhe në fund 92-75 për bardheblutë.

Tirana – Elbasani                 92-75

(27-25, 16-17, 27-19, 22-14)

Tirana: Vogli (14), Sukaj (12), Vaqarri (7), Jani (15), Lilaj (13) / Lasku (23), Mara, Gjyzeli (6), Huqi, Koko (2). Trajner: R. Avrami

Elbasani: A. Çela (24), Uruçi (15), F. Çela (9), B. Skëndaj (5), Leka (16) / I. Skëndaj (1), Balliu (13), Isufi (2), Mata. Trajner: B. Sinani

Gjyqtarë: M. Kasemi (Vlorë), O. Kasmi, A. Bejko (Shkodër)

Kupa e Shqipërisë

Basketboll – Meshkuj

Çerekfinalet:

Të premten:

Partizani – Superior Klima             79-72

Të shtunën: 

Vllaznia – Ardhmëria Basket         95-61

Tirana – Elbasani                            92-75

Të mërkurën:

Kamza Basket – Teuta                    ora 19:00